Cîgirseroka Koma BDPê Pervîn Bûldanê got ku êrîşa li Batmanê hat kirin û di encamê de Ozcan Temel mir, karê kesên şerxwaz in. Ew kes dixwazin dîsa xwîn birije û welêt bibe gola xwînê.
Bûldanê li parlamentoyê daxuyaniya çapemeniyê li dar xist û diyar kir ku êrîşa li Batmanê ya di encamê de Ozcan Temel hat kuştin bûyereke ji rêzê nîne. Bûldanê îdia kir ku êrîş bi awayekî plankirî, organîzekirî hat kirin û armanc provokasyon e û got: "Êrîşa li Batmanê hat kirin qetlîam e."
Bûldanê got ku BDP wek hedef hatiye girtin, lewra heman rojê li taxa Petrolê xebatên BDPyiyan dewam dikir û koma BDPyiyan rastî êrîşa komeke sivîl ku têkildarê partiyeke navê wê tim bi Hîzbûllahê re tê bilêvkirin, hatin.
Bûldanê wiha dewam kir: "Piştî bûyerê, êvarê bi çekan êrîş li partiyiyên me hat kirin. Şahidên bûyerê gotin ku kesên di wesayitan de dema gule berdan ser BDPyiyan tekbîr anîn. Erîşkar ji cihê bûyerê revîn û polês li wir hebûn lê mudaxale nekirin. Piştî bûyerê 6 kes hatin girtin, lê êrîşkarên rasteqîn ev in an na, ev nayê zanîn. Her çiqas kujerên rastî yên bûyerê bên zanîn jî nayên cezakirin. Pêvajo niha hatiye asteke pir heses. Ev êrîş karê kesên ku daxwaza wan ev e ku welêt dîsa bikin gola xwînê ye. Divê demek berê demekê kiryarên êrîşê bên eşkerekirin."
