لافاو لە شارەکانی باکووری رۆژهەڵاتی تورکیا زیانی ماددی و گیانی لێکەوتەوە

ئارتڤین -AA

بەهۆی دروستبوونی لافاو لە پارێزگای ئارتڤین، یەک کەس گیانی لەدەست دا و خێزانێکیش، بێ سەروشوێن بوون.

پارێزگاری ئارتڤین، یڵماز دۆرۆک رایگەیاند، باران بارێنێکی بەخوڕ قەزای یوسف ئیلی گرتووە کە بەهۆیەوە لافاو لە ناوچەکە دروستبووە و رۆچوونی زەویش روویداوە.

یڵماز دۆرۆک لە میانی بەسەرکردنەوەی قەزای یوسف ئیلی ئاماژەی بەوەیش دا، بەهۆی لافاوەکەوە کەسێک کە لە بەنداوی یوسف ئیلی کاری دەکرد گیانی لەدەستداوە و خێزانێکیش کە لە باوک، دایک و کوڕێک پێکهاتوون، بێ سەروشوێن بوون.

پارێزگاری ئارتڤین، یڵماز دۆرۆک باسی لەوەیش کرد، تیمەکانی رزگارکردن لە هەوڵەکانیان بە ئامانجی گەڕان و دۆزینەوەی ئەندامانی ئەو خێزانەی کە بێ سەروشوێن بوون، بەردەوامن.

راشیگەیاند، رێگەی گشتیی نێوان پارێزگاکانی ئارتڤین و ئەرزەڕۆم کە بەهۆی دروستبوونی لافاوەکەوە داخراوە، هەندێک کاتی پێویستە تا دووبارە بەڕووی هاتوچۆکردندا بکرێتەوە.