تورکیا توندوتیژییەکانی بەڕازیل-ی سەرکۆنە کرد

ئەنقەرە - AA

وەزارەتی دەرەوەی تورکیا، توندوتیژییەکانی سەر حکوومەتەکەی سەرۆکی بەڕازیل، لویز ئینانسیۆ لولا دا سیلڤا و کۆنگرێس و دادگای دەستووریی وڵاتەکەی، سەرکۆنە کرد.

لە راگەیەندراوێکدا کە لەلایەن وەزارەتی دەرەوەی تورکیا بڵاوکراوەتەوە، جەخت لەسەر گرنگیی رێزگرتن لە پرۆسەکانی دیموکراسیی و ئەنجامەکانی هەڵبژاردن کراوەتەوە کە رەنگدانەوەی ئیرادەی گەلی بەڕازیلە.

لە راگەیەندراوەکەدا، هەروەها جەخت لەسەر ئەوە کراوەتەوە کە تورکیا هاوسۆزە لەگەڵ حکوومەتەکەی سەرۆکی بەڕازیل، لولا دا سیلڤا و گەلی بەڕازیل بەرامبەر توندوتیژییەکان و هاتووە؛ ''توندوتیژییەکانی سەر حکوومەتەکەی سەرۆکی بەڕازیل، لویز ئینانسیۆ لولا دا سیلڤا و کۆنگرێس و دادگای دەستووریی وڵاتەکە، سەرکۆنە دەکەین''.

دوێنێ لە شاری بەڕازیلیا لایەنگرانی سەرۆکی پێشووی بەڕازیل، جاییر بۆلسۆنارۆ رێپێوانیان سازکرد و داوای دەستوەردانی سوپایان کرد و بەربەستەکانی پۆلیسیان بەزاند و چوونە ناو بینای کۆنگرێس.

بەمەبەستی بڵاوەپێکردنی خۆپیشاندەران، پۆلیس غازی فرمێسکڕێژی بەکارهێنا، بەڵام نەیتوانی رێگریان لێبکات و خۆپیشاندەران هەڵیانکوتایە سەر کۆشکی سەرۆکایەتی و بینای دادگای باڵا.

دواتر هێزە ئەمنییەکان خۆپیشاندەران و لایەنگرانی جاییر بۆلسۆنارۆیان لە کۆنگرێس و کۆشکی سەرۆکایەتی دەرکرد و کۆنترۆڵیان کردنەوە.