کارلۆڤ بە رێوڕەسمێکی فەرمی بۆ رووسیا ماڵئاوایی لێکرا

تەرمی باڵیۆزی رووسیا لە ئەنقەرە ئاندرێی کارلۆڤ بە رێوڕەسمێکی فەرمی لە فڕۆکەخانەی ئەسەنبۆغای ئەنقەرەوە بۆ مۆسکۆ ماڵئاوای لێکرا.

لە رێوڕەسمەکەدا بەناوی حکوومەتی تورکیا، ھەریەک لە جێگری سەرۆکوەزیران توغرول تورکەش، وەزیری ناوخۆ سولەیمان سۆیڵو و بەناوی وەزارەتی دەرەوە جێگری وەزیر ئەحمەد یڵدز بەشدار بوو.

ھاوکات ژمارەیەکی زۆر لە نوێنەرانی وڵاتان بەشدار بوون. خێزانی کارلۆڤ و باڵیۆزانی زۆرێک لە وڵاتان بە تایبەتیش ئەمریکا، ئیسرائیل و بەریتانیا بەشدارییان لە رێوڕەسمەکە کرد.

تەرمی کارلۆڤ بە ئاڵای رووسیا داپۆشرا و ھاوسەکەی مارینا کارلۆڤ بە فرمێسکەوە باوەشی بە تابوتەکەیەوە نا.

دواتر تەرمی کارلۆڤ بەرەو مۆسکۆی پایتەختی رووسیا بەڕێکرا.

وەزیری دەرەوەی تورکیا مەولوود چاوشئۆغڵو لەوبارەیەوە رایگەیاند ئەگەر دەرفەت ھەبێت لە رووسیا پێشوازی لە تەرمی کارلۆڤ دەکات و بەشدار دەبێت لە رێوڕەسمی بەخاکسپاردنیشی.