کۆبوونەوەی رەجەب تەیب ئەردۆغان و ئەنگێلا مێرکڵ

ئەنقەرە-

سەرکۆماری تورکیا، رەجەب تەیب ئەردۆغان و راوێژکاری ئەڵمانیا، ئەنگێلا مێرکڵ کۆبوونەوەیەکیان لەڕێی ڤیدیۆ کۆنفراسەوە ئەنجامدا.

بەگوێرەی راگەیەندراوێکی فەرمانگەی پەیوەندییەکان لە سەرۆکایەتی کۆماری تورکیا لە کۆبوونەوەکەدا، باس لە پەیوەندییەکانی نێوان تورکیا-ئەڵمانیا، تورکیا- یەکێتیی ئەورووپا و پرسەکانی رۆژهەڵاتی ناوەڕاست کراوە.

رەجەب تەیب ئەردۆغان باسی لەوە کرد کە راگەیەندراوی کۆبوونەوەی لووتکەی سەرکردەکانی یەکێتیی ئەورووپا دووربووە لە هەر زەمینەسازییەکی تایبەت بە دانوستان و هەماهەنگی.

سەرکۆماری تورکیا تیشکی خستەسەر ئەوەی کە وێڕای نیازپاکی تورکیا، بەڵام یەکێتیی ئەورووپا ملی کەچکردووە بۆ چەواشەکارییەکانی یۆنان و کۆماری قوبرسی یۆنان، جەختی لەوەش کردەوە کە پێویستە بەرژەوەندییە گەورەکانی یەکێتیی ئەورووپا نەکرێنە قوربانی بەرژەوەندی چەند ئەندامێکی بچووکی یەکێتییەکە.

باسیشی لە گرژییەکانی سەر سنووری ئازەربایجان-ئەرمینیا کرد و رایگەیاند "پێویستە پرسی خاکە داگیرکراوەکانی ئازەربایجان لە چوارچێوەی یاسا نێودەوڵەتییەکاندا، چارەسەربکرێت".