Sarmand Hameed
23 ئاب 2022•نوێکردنەوە: 24 ئاب 2022
هەولێر - AA
ئەنجوومەنی باڵای دادوەریی لە عێراق دەستپێکردنەوەی کارەکانی راگەیاند کە پێشتر بەھۆی مانگرتنی لایەنگرانی رەوتی سەدر لەبەردەم تەلاری ئەنجوومەن، ھەڵپەساردنی کارەکانی خۆی، دادگاکانی سەربە ئەنجوومەنەکە و دادگای باڵای فیدراڵیی راگەیاندبوو.
لەو راگەیەندراوەی کە لە ئەنجوومەنی باڵای دادوەریی لە عێراقەوە بڵاوکراوەتەوە، ئەوە خراوەتەڕوو کە بە لەبەرچاوگرتنی کشانەوەی خۆپیشاندەران و ھەڵگرتنی گەمارۆی سەر تەلاری ئەنجوومەنی باڵای دادوەریی و دادگای باڵای فیدراڵی، بڕیاردرا لە بەیانی رۆژی چوارشەممە رێکەوتی ٢٤ی ئابی ٢٠٢٢ دەوامی ئاسایی لە سەرجەم دادگاکان دەستپێبکاتەوە.
لە بەشێکی دیکەی راگەیەندراوەکەدا، ئەنجوومەنی باڵای دادوەریی سوپاسی ھەموو ئەو لایەن و کەسایەتییە ناوخۆیی و نێودەوڵەتییانەی کردووە کە پشتیوانییان لە دەسەڵاتی دادوەریی کردووە و پەرۆشی خۆیان بۆ بنەمای سەروەری یاسا و رێزگرتن لە دەستوور نیشانداوە.
ھەر لە راگەیەندراوەکەدا جەخت لەوە کراوەتەوە کە ئەنجوومەنی باڵای دادوەریی بەردەوام دەبێت کە گرتنەبەری رێوشوێنی یاسایی بەرامبەر بە ھەر کەسێک کە پێشێلی یاسا بکات و دامەزراوە گشتییەکان پەکبخات.
ئەمڕۆ سێشەممە ٢٣ی ئابی ٢٠٢٢، ژمارەیەکی زۆر لە لایەنگرانی رەوتی سەدر خۆیان گەیاندە بەردەم تەلاری ئەنجوومەنی باڵای دادوەریی لە ناوچەی سەوز و خیوەتی مانگرتنیان جێگیرکرد.
دواتر ئەنجوومەنی باڵای دادوەریی لە عێراق لە راگەیەندراوێکدا ھەڵپەساردنی کارەکانی خۆی، دادگاکانی سەربە ئەنجوومەنەکە و دادگای باڵای فیدراڵیی راگەیاند.
ئێوارەی ئەمڕۆ، وەزیری سەدر، ساڵح محەمەد عێراقی داوای لە خۆپیشاندەرانی بەردەم تەلاری ئەنجوومەنی باڵای دادوەریی عێراق کرد بکشێنەوە و تەنھا خێوەتەکان بھێڵنەوە و دروشمەکانی (ناڕەزایەتی شەھیدانی سپایکەر، خەڵکی مووسڵ، گەڕانەوەی پارەی تاڵانکراو، لێپرسینەوە لە گەندەڵکاران، دورخستنەوەی داواکاری گشتی، بەجێھێنانی دەسەڵاتێکی دادوەریی سەربەخۆ و بێ لایەن) لەسەریاندا ھەڵبواسن.
ئەمەیش لە کاتێکدایە ماوەی ٢٤ رۆژە، خۆپیشاندان و مانگرتنی لایەنگرانی رەوتی سەدر لەبەردەم تەلاری ئەنجوومەنی نوێنەران لە ناوچەی سەوز ناوەڕاستی بەغدا بەردەوامە کە داوا دەکەن ئەم خولەی ئەنجوومەنی نوێنەران ھەڵبوەشێندرێتەوە و ھەڵبژاردنی پێشوەختە ئەنجام بدرێت.
