سلێمانی.. دەستپێکردنی دەنگدانی تایبەت

سلێمانی ـ AA

لە کاتژمێر حەوتی بەرەبەیانی ئەمڕۆ دەرگای بنکەکانی تایبەت لە سنوری پارێزگای سلێمانی بۆ دەنگدانی ئەنجومەنی نوێنەرانی عێراق کرانەوە، بەشێکی زۆری ھێزە سەربازی و ئەمنییەکان لە بەرەبەیانییەکی زووەوە ھاتبوونە بەردەم بنکەکانی دەنگدان و لە نۆرەدان بۆ چونە ژورەوە و دەنگدان.

لە سنوری پارێزگای سلێمانی ٨٢ ھەزار و ٨٧٣ کەس لەمڕۆدا مافی دەنگدانیان ھەیە، بۆ ئەو مەبەستەش کۆمیسیۆنی باڵای سەربەخۆی ھەڵبژاردنەکانی عێراق ٣٣ بنکەی دەنگدانی کردووەتەوە کە ١٩٠ وێستگە لەخۆ دەگرن.

بڕیارە رۆژی شەممەی داھاتوو ھەڵبژاردنی گشتی ئەنجومەنی نوێنەرانی عێراق بەڕێوە بچێت.

پارێزگای سلێمانی ١٨ کورسی پەرلەمانی عێراقی بۆ دیاری کراوە، بۆ پڕ کردنەوەی ئەو کورسییانەش ٢٠٨ کاندید لە ١٢ کیانی سیاسی خۆیان پاڵاوتووە و کێبڕکێ لەسەر بەدەستھێنانی ئەو کورسیانە دەکەن.

لە رۆژی ھەڵبژاردندا لە سنوری پارێزگای سلێمانی یەک ملیۆن و ٣٠٤ ھەزار و ١٦٨ کەس مافی بەشداری کردنی دەنگدانیان ھەیە، بۆ ئەو مەبەستەش کۆمیسیۆنی ھەڵبژاردنەکان ٥٠٣ بنکەی دەنگدانی کردووەتەوە و ئەو بنکانەش دوو ھەزار و ٩٤٧ وێستگەیان لەخۆ گرتووە ، ھەروەھا ١٢ بنکەی دەنگدانی تایبەت بۆ ئاوارەکانیش کراوەتەوە.