سلێمانی
كۆنفراسەكە ئەمڕۆ لە هۆڵی تەوار بە ئامادەبوونی ژمارەیەك لە نووسەران و مامۆستایانی زانكۆ و زانایانی هەرێمی كوردستان و كوردستانی توركیا و ئێران دەستی پێكرد و ماوەی دوو رۆژ دەخایەنێت.
كۆنفراسەكە لەلایەن ناوەندی هەژان بۆ فیكر و مەعنەویەت ئەنجامدراوە، تێیدا 13 توێژینەوەی تایبەت لەسەر زانای كۆچكردووی كوردی ناودار لە كوردستانی ئێران ناسری سوبحانی پێشكەش دەكرێت.
بەڕێوەبەری گشتی كۆنفراسەكە تەحسین حەمەغەریب لە بارەی كۆنفراسەكەوە گوتی: "كۆبونەوە و كۆنفراسی ئەمجارە جیاوازە و لەسەر سفرەی مەعریفە و زانست و مەعنەویەتی پیاوێك (دوور لە سیاسەت)كۆبووینەتەوە كە هەمووان بە توانا و داهێنان و فیكری ئاشناین".
هەروەها گوتی:" ناوەندی هەژان دەمێكە هەوڵی كۆبونەوەی یارانی سوبحانی دەدات لە كۆنفراسێكی لەم شێوەیەدا و ئەمڕۆ هەمووان لەسەر سفرەی فیكری كەموێنەی ئەو لە پڕۆژەی (رۆڵی كورد لە شارستانییەتی ئیسلامیدا) و لە كۆنفراسی زانستی ناسری سوبحانیدا كۆكردۆتەوە ، بۆ ئەوەی بزانرێت كورد چی پێكراوە و چی پێدەكرێت".
لە كۆنفراسەكەدا 13 توێژینەوە لە بوارە جیاجیاكانی ژیانی ناسری سوبحانی لەلایەن پسپۆڕان و شارەزایانی ژیانی ئەوەوە پێشكەش دەكرێن، لەوانەش : پێگە فكرییەكانی بانگەواز لە دیدی ناسری سوبحانی لەلایەن عومەر عەبدولعەزیز. بنەماكانی بانگەواز لای ناسری سوبحانی لەلایەن د.مەحمود وەیسی. فقهناسی سوبحانی لەلایەن د.محەمەد پێنجوێنی. میتۆدی سوبحانی لە تەفسیردا د.ئاراس محەمەد. میتۆدی تەفسیر لە نێوان سوبحانی و نەورەسی و مەلای گەورەدا لەلایەن د.جهانگیر وەڵەدبەگی. خەیاڵی سوبحانی لەلایەن تەحسین حەمەغەریب و دوو توێژینەوە لەبارەی سیستمی سیاسی لای سوبحانی لەلایەن د.سەردار قادرو ئەبوبەكر عەلی.لەگەڵ چەند توێژینەوەیەكی تری تایبەت لەو بارەیەوە.
ئەبوبەكر عەلی نووسەرو توێژەر لە توێژینەوەكەیدا لەبارەی سیستمی سیاسی لای سوبحانی دەڵێت: "قسەكردن لەسەر سیستمی سیاسی و بواری سیاسەت لەدەرەوەی پسپۆڕی سوبحانی بووە، هەربۆیە كاركردنی زیاتر لە میتۆدی دەعەویانەوە نزیكە تا شیكاركردنی سیاسی و كاركردن بە ئاراستەی چەمك و بنەماكانی شێوازی دەوڵەتداری هاوچەرخ".
د.ئاراس محەمەد ساڵح لە بارەی رێبازی سوبحانی لە تەفسیری قورئاندا دەڵێت: "سوبحانی رێبازێكی تایبەت بە خۆی هەیە لە مامەڵەكردن لەگەڵ ئایەت و سورەت و شرۆڤەكردنی ئایەتەكان بە جیا، ئەو كاتێك شرۆڤەی سورەتێك دەكات سەرەتا دەگەڕێتەوە بۆ ئەو هەلومەرجە كۆمەڵایەتی و دەعەوییەی ئایەت و سورەتەكەی تێدا دابەزیوە".
ناسری سوبحانی لەدایكبوی ساڵی 1951ی كوردستانی ئێرانە، یەكێك بووە لە زانا و مامۆستا ئاینییە ناودارەكانی ئەهلی سونەی كوردستان ئێران و بەشداری لە شۆرشی ناڕەزایەتی گەلانی ئێران دژی رژێمی پێشووی وڵاتەكەی كردووە.دواتر بەهۆی ناڕەزایەتی بەرامبەر سیاسەتی حكوومەتی نوێی ئێران لەبەرامبەر مافی كوردو سونەكاندا دەستگیركراوەو ساڵی 1990 لەسێدارە دراوە.
سوبحانی جگە لە كتێبە دەستنووسەكانی كە 10 دانەیە، نزیكەی 100 سەعات وانەی دەنگی لە بوارە جیاوازەكانی زانستە ئیسلامییەكان بەهەر سێ زمانی كوردی و عەرەبی و فارسی تۆماركردووە.
