جوانی دیمەنی بەھار لە ھەورامان

سلێمانی – AA

ھەورامان لە چوار وەرزەی ساڵدا جوانی و تایبەتمەندی خۆی ھەیە و ھەر وەرزێک لەم ناوچەیە بۆن و بەرام و دیمەنێکی تایبەتی ھەیە.

لەئێستادا و لەگەڵ ھاتنی وەرزی بەھاردا دیمەن و کەشێکی رەنگاوڕەنگی زێڕینی بۆ ھەورامان ھێناوە، تائێستاش چیاکانی ناوچەکە تارای سپی بەفرینیان پۆشیوە و کەشی سەرماو سۆڵە لەسەر ناوچەکە ماوە و دیمەنی بەفر و گژو گیای سەوز و گوڵی سور تێکەڵ بەیەک بوون.

ھەورامان ناوچەیەکی شاخاوی و گەشتیارییە لە سنووری شاری ھەڵەبجە، ھەڵکەوتەی جوگرافی و دیمەنی جوانی باخ و شاخ و دۆڵی ناوچەکە و سازگاری ئاو و ھەواکەی وایکردووە لە ھەر چوار وەرزەکەی ساڵدا گەشتیاران روو لەو ناوچەیە بکەن بۆ بینینی دیمەنی جوانی ناوچەکە، لە ئێستاشدا رۆژانە ژمارەیەکی زۆری گەشتیار سەردانی ئەو ناوچەیە دەکەن.

ئەم ناوچەیە چەندین سەیرانگای لەخۆگرتووە و دیمەنی چڕی باخ و بێستان و شاخەکانی جێگای سەرنجی گەشتیارانە و دیمەنێکی سەرنجڕاکێشی ھەیە.