چواردەهەمین پێشانگای نێودەوڵەتیی سلێمانی کرایەوە

سلێمانی - AA

لە شاری سلێمانی چواردەهەمین پێشانگای نێودەوڵەتیی سلێمانی DBX بە بەشداری ١٦٠ کۆمپانیای ناوخۆیی و بیانیی کرایەوە.

ئەمڕۆ ٢٥ی ئابی ٢٠٢١ لە شاری سلێمانی و بەجێبەجێکردنی رێنمایە تەندروستییەکان، چواردەهەمین پێشانگای نێودەوڵەتیی DBX بە بەشداری ١٦٠ کۆمپانیای ناوخۆیی و بیانیی کرایەوە کە بڕیارە بۆماوەی شەش رۆژ بەردەوام بێت.

بەڕێوەبەری پەیوەندییەکان و راگەیاندن لە کۆمپانیای عێراق تەقەدوم، داستان خالید لەبارەی پێشانگاکەوە رایگەیاند "کۆمپانیاکەمان ساڵانە پێشانگای نێودەوڵەتیی DBX بەسەرپەرشتی ژووری بازرگانیی و پیشەسازیی سلێمانی و بەچاودێریی پارێزگاری سلێمانی و لایەنە پیوەندیدارەکان دەکاتەوە".

داستان خالید ئاماژەی بەوەشدا، کۆمپانیا بەشدارەکان لە بوارەکانی خۆراکی، بیناسازی، پەیوەندییەکان، تەکنەلۆجیا، ئەندازیاری، پاکەرەوە، کەلوپەلی جوانکاری، جلوبەرگ، پێداویستی ئۆتۆمبێل، بڵاوکراوە و چاپەمەنی، کتێب، تەندروستی، کارگەی لەقتونان، کارەبا و پێداویستی ناوماڵ کار دەکەن.

ناوبراو ئاشکرای کرد کە کۆمپانیا بەشدارەکان لە هەشت وڵاتەوە هاتوون؛ ئێران، تورکیا، میسر، ئازەرباینجان، فەڕەنسا، ئیتاڵیا، لوبنان، ئوردن، هەروەها کۆمپانیاکانی وەزارەتی پیشەسازیی عێراق و بریکارنامەکانی وڵاتانی ئەورووپا و ئەمریکا کە لە هەرێمی کوردستان وەکیلیان هەیە.