سلێمانی.. خۆپیشاندانی مامۆستایان بەردەوامە

سلێمانی

ئەمڕۆ مانگرتن و خۆپیشاندانی مامۆستایان لە ناو شاری سلێمانی دەستی پێ كردەوە و بۆ رۆژی 12 یەم چوونەوە بەردەم بەڕێوەبەرایەتی پەروەردەی شارەكە لە سەر شەقامی سەرەكی سالم و شەقامەكەیان داخستەوە.

مامۆستایان داوای مووچەی چوار مانگی رابردوویان دەكەن كە لەلایەن حكوومەتەوە پێیان نەدراوە، بەڵام بڕیارە سبەی دووشەممە حكوومەتی هەرێم مووچەی مانگی تەمووزی رابردوو بدات بە مامۆستایان و كارمەندانی وەزارەتی پەروەردە.

دابەشكردنی مووچەی مانگی تەمووز مامۆستایانی لە مانگرتن و خۆپیشاندانەكان پاشگەز نەكردۆتەوە.

لە كۆبوونەوەی دوێنێ‌ شەممەی لقی سلێمانی یەكێتی مامۆستایانی كوردستان بڕیاردرا مانگرتن تا رۆژی سێشەممەی داهاتوو بەردەوامی هەبێت.

جیاوازی مانگرتن و خۆپیشاندانی مامۆستایان لەگەڵ خۆپیشاندانەكانی دیكە ئەوەیە كە ئەوان بەشێوەیەكی هێمنانە خۆپیشاندانەكانیان ئەنجام دەدەن و دروشمیان مانگرتن و خۆپیشاندانی هێمنانە و ئاشتیانەیە.

هەروەها رێگا نادەن لە خوێندنەوەی وتار و دروشمەكاندا هێرش بكرێتە سەر هیچ حزب و لایەنێك، ئەوەیش كێشەی بۆ سەرپەرشتیارانی خۆپیشاندانەكە دروستكردووە بەهۆی ئەوەی هەندێك كەس دەیانەوێت خۆپیشاندانەكە بقۆزنەوە بۆ هێرش كردنە سەر لایەنەكان.

یەك لەسەرپەرشتیارانی خۆپیشاندانەكە عادل حسێن بۆ ئاژانسی ئانادۆڵو گوتی: "وەك مامۆستایان بەردەوامین لە مانگرتن و خۆپیشاندان تا وەرگرتنی مووچەی مانگەكانی رابردوو، ئێمە لێرەوە وانەكانمان دەڵێینەوە و قوتابییەكانمان فێری وانەی گەندەڵی دەكەین و فێریان دەكەین هیچ گەندەڵییەك لەكەس قبووڵ نەكەن".

مامۆستایەكی دیكەی بەشداری خۆپیشاندانەكە دارا حەمەحسێن گوتی: "ئیرادەی تاكی كورد زۆر تێكشكێنراوە و نازانین بە چ رۆحێتێكەوە بچینەوە پۆلەكان و دەست بە وانەگوتنەوە بكەین بە قوتابیان".

ئەو مامۆستایە گوتیشی: "بەداخەوە دەسەڵات گوێی لە داخوازی مامۆستایان و هاووڵاتییان نەگرت و زۆر بێباك بوو بەرامبەر داواكانیان، ئەوەش وای كرد توڕەیی خەڵك بەو شێوەیە بتەقێتەوە".

مانگرتن و خۆپیشاندانی مامۆستایانی سلێمانی رۆژانە لە سەعات 9 تا 11ی پێش نیوەڕۆ لە بەردەم بەڕێوەبەرایەتی پەروەردە بەڕێوەدەچێت، تییدا چەندین دروشم و هوتاف بەرز دەكرێتەوە و مامۆستایان پەیامی خۆیان دەخوێننەوە.

لەلای خۆشیانەوە هێزەكانی ئەمنی رێوشوێنی ئەمنی پێویستیان گرتووەتە بەر بۆ پاراستنی خۆپیشاندانەكان.