Извршниот директор на „Нвидиа“: САД заостануваат, Кина е на пат да ја добие трката за вештачката интелигенција

ИСTАНБУЛ (АА) – Извршниот директор на американскиот технолошки гигант „Нвидиа“, Џенсен Хуанг, предупреди дека Соединетите Американски Дрќави (САД) заостануваат во развојот на вештачката интелигенција (AI), додека Кина е на добар пат да ја добие трката, објави „Фајненшал тајмс“, јавува Анадолу.

Хуанг изјави дека Западот, вклучувајќи ги САД и Велика Британија, е ограничен од „цинизам“ и прекумерни регулативи, и повика на „повеќе оптимизам“ за време на самитот на Фајненшал тајмс за иднината на вештачката интелигенција.

Тој ги критикуваше новите државни прописи во САД, предупредувајќи дека тие би можеле да создадат 50 различни регулативи, за разлика од кинеските субвенции за енергија кои им овозможуваат на домашните компании пониски трошоци за работа и развој на алтернативи за чиповите на „Нвидиа“.

„Во Кина, енергијата е бесплатна“, рече Хуанг.

Изјавите на Хуанг доаѓаат во време кога администрацијата на претседателот Доналд Трамп ја задржува забраната за продажба на најнапредните чипови на „Нвидиа“ во Кина, и покрај неодамнешната средба меѓу Трамп и кинескиот лидер Си Ѓинпинг.

Претходно, Хуанг предупреди дека најновите американски модели на вештачка интелигенција едвај ги надминуваат кинеските ривали, и побара од Владата да го отвори пазарот за чиповите на „Нвидиа“, за да се зачува глобалната зависност од американската технологија.

По средбата со Си минатиот месец, Трамп изјави дека нема да дозволи Кина да има пристап до најнапредните чипови „Блеквел“, велејќи за Си-би-ес њуз: „Најнапредните чипови нема да ги има никој освен САД.“

Портпаролката на Белата куќа, Каролин Левит, во вторникот повтори дека „САД во моментов не се заинтересирани да ги продаваат чиповите ‘Блеквел’ на Кина.“