Islam Uddin
06 Ноември 2025•Ажурирај: 07 Ноември 2025
АНКАРА (АА) - Филипинскиот претседател Фердинанд Маркос Џуниор денес прогласи вонредна состојба поради разорните последици од тајфунот Калмаеги, во кој загинаа 114 лица, а 127 се водат како исчезнати, според најновите податоци, јавува Анадолу.
Одлуката е донесена за време на брифингот во Националниот совет за намалување и управување со ризици од катастрофи, според официјалното соопштение од претседателскиот Кабинет.
Маркос рече дека со преземениот потег ќе се забрзаат напорите за спасување, помош и рехабилитација, овозможувајќи побрз пристап до средства за итни случаи и поедноставни процеси на набавки.
„Поради обемот на, да речеме, проблематичните области што беа погодени од Тино и ќе бидат погодени од (тајфунот) Уван, имаше предлог од (Советот), кој го одобрив, да прогласиме национална катастрофа“, рече Маркос.
Тој додаде дека се очекува од 10 до 12 региони да бидат погодени од двојните тајфуни, бидејќи земјата се подготвува и за тајфунот Уван.
- Поплави, свлечишта, прекини во електричната енергија -
Диего Маријано, заменик-портпарол на Канцеларијата за цивилна одбрана, изјави дека 82 лица се повредени во Централен Висаи, најтешко погодениот регион, објави локалниот медиум „Инквајрер“.
Моќниот тајфун, локално познат како тајфун Тино, корнеше покриви, откорна дрвја и столбови за електрични инсталации и предизвика масовни поплави.
Калмаеги ја напушти земјата утринава, но продолжува да носи дожд во делови од Лузон и регионот Минданао, соопшти метеоролошката агенција на земјата.
Повеќе од 500.000 луѓе се раселени, а над 1,4 милиони се погодени во регионот Централен Висаи, вклучувајќи делови од покраината Себу.
Силните поплави и лизгањата на земјиштето, исто така, ги блокираа патиштата во оддалечените области, додека некои општини доживеаја прекини во електричната енергија, соопштија властите.
Уништувањето доаѓа по силниот земјотрес со магнитуда од 6,9 степени што го погоди Себу на 30 септември, при што загинаа многу луѓе, а илјадници беа раселени.
Властите соопштија дека напорите за помош се во тек, додека спасувачките екипи работат за да стигнат до оддалечените области отсечени од поплавите и лизгањето на земјиштето.
Тајфунот утринава предизвика две свлечишта во регионот Висаи, првото во Јужен Лејте, а потоа во Себу.
Се очекува да ја врати силата над Јужното Кинеско Море пред да се упати кон Виетнам, каде што властите се подготвуваат за неговото пристигнување утре (петок).
