Канада ќе ги отвори вратите за „што е можно повеќе“ Украинци

ВАРШАВА (АА) - Канадскиот премиер Џастин Трудо соопшти дека Канада ќе прими што е можно поголем број бегалци од Украина, пренесува Агенција Анадолија (АА).

Трудо при посетата на Полска се осврна на ситуацијата во Украина.

Нагласувајќи дека жали кога гледа како милиони луѓе бегаат од Украина оставајќи сѐ зад себе, Трудо рече дека Канада ќе помогне и дека е подготвена за тоа.

Трудо на средбата со претседателот Анджеј Дуда и премиерот Матеуш Моравецки во Полска изјави дека ја поздравува поддршката на оваа земја за Украина и отворањето на вратите за бегалците.

Посочувајќи дека процедурите за имиграција се итно сменети за да може брзо да се примат украински бегалци во земјата, Трудо рече: „Ќе им дозволиме да работат и да се образоваат кога ќе пристигнат.“

Трудо, исто така, додаде дека по завршувањето на конфликтот во Украина, оние кои нема да сакаат да се вратат во својата земја ќе може да останат во Канада.

Истакнувајќи дека Русија и руските функционери ќе ги изведат пред Меѓународниот кривичен суд за нивните напади во Украина, Трудо рече дека светот ќе направи сѐ за рускиот претседател Владимир Путин да одговара за воените злосторства.

Трудо, нагласувајќи го силниот и решителен отпор на украинскиот народ кој ја брани својата татковина, додаде дека Путин направил голема грешка и дека ќе ја изгуби војната.