Претседавачот на Генералното собрание на ОН ги посети камповите на Рохинџите во Бангладеш

ДАКА

Високиот претставник на ОН, Волкан Бозкир, денес ги посети Рохинџите во јужниот дел на Бангладеш за да ја види состојбата на прогонетиот народ во најголемиот светски бегалски камп, јавува Агенција Анадолија (АА).

„Се сретнав со претставници на Рохинџите во Кокс Базар. Преживеаја незамисливи ужаси и прогонства и се упатија на опасни патувања за да стигнат до безбедноста во Бангладеш“, истакна Бозкир на социјалната мрежа Твитер, по посетата на кампот.

Бозкир, исто така, познат по својата активна улога во ОН против израелската агресија во Палестина и убиствата на арапските цивили, го посети логорот во време кога ескалираните немири во Мјанмар по воениот удар во февруари го направија понеизвесно мирното враќање на Рохинџите.

Премиерката на Бангладеш, Шеик Хасина, исто така, го подигна ова прашање за време на нејзината средба со Бозкир во главниот град Дака во вторникот.

„Како што се справуваме со неодамнешните политички превирања во Мјанмар, не треба да се заборави загриженоста во врска со маките на муслиманите Рохинџи, особено во државата Аракан и другите малцинства во Мјанмар“, објави Бозкир на социјалната мрежа Твитер.

Тој исто така го изрази своето задоволство од аранжманите за Рохинџите, без државјанство, кои издржаа геноцид во нивната матична земја.

Осврнувајќи се на Рохинџите како „аракански муслимани“ - користејќи го старото име за државата Аракан, нивниот традиционален дом - тој објави на Твитер: „Им благодарам на властите за овој корисен извештај и значајната работа што ја прават секој ден.“

Бангладеш е дом на над 1,2 милиони Рохинџи без државјанство, од кои повеќето избегаа од бруталната воена акција во Аракан во август 2017 година спроведена од безбедносните сили на Мјанмар.

Рохинџите, опишани од ОН како најпрогонуваните луѓе во светот, се соочија со зголемен страв од напад откако десетици беа убиени во комуналното насилство во 2012 година.

„Ги слушав нивните приказни, надежи и соништа. И покрај сè, тие опстојуваат“, објави Бозкир на социјалната мрежа Твитер.

Дипломатот ја посети и турската болница во кампот број 9, што обезбедува значајни медицински услуги на бегалците Рохинџи.

„Го пофалувам целиот хуманитарен и медицински персонал на теренот за нивната посветена работа во тешки околности“, рече тој.

За време на неговата посета, на Бозкир му се придружи и Мустафа Осман Туран, амбасадорот на Турција во Бангладеш.