Beyza Binnur Dönmez
12 Март 2026•Ажурирај: 12 Март 2026
ЖЕНЕВА (АА) – Според истражувањето на швајцарскиот јавен сервис РТС, извозот на стоки со двојна употреба и воена опрема во Израел достигнал вредност над 30,8 милиони долари во периодот од 2024 до март 2025 година, јавува Анадолу.
Неколку десетици швајцарски компании продолжуваат со снабдување на опрема што потенцијално би можела да се користи за воени цели, во војната на Израел во Газа, се наведува во веста.
Извозот на таков тип стоки забележа значителен пораст на почетокот на 2024 година. Според дозволите за извоз прегледани од РТС, во првиот квартал од таа година во Израел биле испорачани стоки за двојна употреба и воена опрема во висина од речиси 6 милиони швајцарски франци, во споредба со 238.000 швајцарски франци остварени во текот на последните три месеци во 2023 година.
Од државниот Секретаријат за економски прашања на Швајцарија (СЕКО), кој е надлежен за издавање лиценции за извоз, изјави дека испораката целосно е во рамките на швајцарскиот закон, се наведува во веста. Сепак, ваквата политика наиде на остри критики во контекст на сè поголемиот меѓународен надзор врз израелската воена кампања.
Лиценците покажаа дека компонентите биле испорачувани до израелски субјекти поврзани со одбраната, меѓу кои и компании поврзани со Министерството за одбрана и производителот на оружје, Елбит системс.
Швајцарските производители на машински алати имаат значителен удел во овој извоз, открива истрагата. Компаниите, како „TRUMPF Schweiz AG“ и „StarragTornos“, доставувале опрема за ласерско сечење и машини за високопрецизна обработка на израелски фирми вклучени во развојот на одбранбени технологии.
Во истражувањето на РТС се наведуваат и други компании, меѓу кои и Металукс, која извезувала хибридни електронски кола за израелски фирми поврзани со технологија за проектили и беспилотни летала, како и „Mipa Coatings Schweiz AG“, која обезбедувала специјализирани бои што се користат за воена опрема, како што се радарски системи и оклопни возила.
Во веста се идентификува и компанијата „Georg Fischer AG“, која извезувала вентили и компоненти за цевководни системи за израелски индустриски клиенти, меѓу нив и една рафинерија за нафта, чии купувачи вклучуваат компании директно поврзани со одбранбениот сектор.
Компаниите со кои контактирал РТС изјавија дека нивниот извоз е во согласност со швајцарските регулативи и одлуките за лиценцирање издадени од СЕКО.
