Betül Yılmaz
21 Октомври 2025•Ажурирај: 22 Октомври 2025
КАИРО / ИСТАНБУЛ (АА) – Шефот на египетската разузнавачка служба, Хасан Рашад, денес пристигна во Израел на разговори за прекин на огнот во Газа со израелски претставници, јавува Анадолу.
Израелската јавна телевизија КАН соопшти дека Рашед се сретнал со израелскиот премиер Бенјамин Нетанјаху за да разговараат за спроведувањето на договорот за прекин на огнот.
Египетскиот државен канал „Ал-Кахера њуз“ соопшти дека на разговорите на Рашад во Израел ќе се зборува и за внесувањето на хуманитарната помош во Газа.
Шефот на египетската разузнавачка служба за време на посетата ќе се сретне и со специјалниот претставник на САД за Блискиот Исток, Стив Виткоф.
Ова е прва посета на висок египетски претставник на Израел од почетокот на геноцидната војна на Тел Авив врз Газа во октомври 2023 година.
Договорот за прекин на огнот во Газа стапи на сила на 10 октомври, врз основа на планот претставен од американскиот претседател Доналд Трамп. Првата фаза вклучуваше ослободување на израелските заложници во замена за палестинските затвореници.
Планот, исто така, предвидува обнова на Газа и воспоставување нов управувачки механизам без Хамас.
Според Министерството за здравство на Газа, од октомври 2023 година во израелската геноцидна војна се убиени над 68.200 Палестинци, а над 170.300 се повредени.
