Merve Gül Aydoğan Ağlarcı
15 Декември 2022•Ажурирај: 16 Декември 2022
АНКАРА (АА) - Туркије денеска изрази подготвеност да соработува со Сирија и Русија во своите антитерористички активности, јавува Агенција Анадолија (АА).
„Во моментов сакаме да преземеме чекори со Сирија и Русија, како трио. За ова, прво треба да се состанат нашите разузнавачки служби, потоа нашите министри за одбрана, а потоа и министрите за надворешни работи“, изјави за новинарите турскиот претседател Реџеп Таип Ердоган во претседателскиот авион на враќање од посетата на Туркменистан.
Нагласувајќи дека лидерите на Туркије, Русија и Сирија би можеле да се состанат на разговори по средбите на претставниците на разузнавањето, шефовите за одбрана и за дипломатија, Ердоган рече дека неговиот руски колега Владимир Путин го поздравил овој предлог во нивниот последен телефонски разговор.
Потсетувајќи дека терористичката организација е активна во Сирија, особено во нејзините северни делови, Ердоган нагласи дека Туркије ќе ги преземе работите во свои раце доколку земјите како САД продолжат да обезбедуваат илјадници камиони оружје, муниција и опрема за терористите во Сирија.
Турскиот претседател, исто така, упати критики за последните изјави на шефот за надворешна политика на Европската Унија, Жозеп Борел, насочени кон Туркије, поради нејзините врски со Русија, повикувајќи да се приклучи на санкциите на ЕУ против Москва.
„Борел не го сметам за мој соговорник. Тој е соговорник на господинот [турски министер за надворешни работи] Мевлут [Чавушоглу]“, рече Ердоган.
„Со други зборови, Борел не може да ги одредува или регулира нашите односи со Русија. Тој нема ниту квалитет, ниту капацитет да донесе таква одлука за овие прашања. Тоа е многу непристоен коментар“, додаде тој.
Прашан за преземените мерки на Германија против заговорот за државен удар од страна на десничарските екстремисти, Ердоган ги поздрави мерките и рече дека е важно расветлувањето на процесот во рамките на владеењето на правото.
„Мојот народ, мојата земја се тие што најдобро ќе го разберат чувството во Германија против плановите за пуч. За жал, не можам да кажам дека го гледаме истото сочувство и разбирање од нашиот пријател и сојузник Германија“, рече турскиот претседател.
