Thaçi: Kosova beson në pastërtinë e luftës së UÇK-së

PRISHTINË (AA) – Presidenti i Kosovës, Hashim Thaçi, me rastin e largimit të pjesëtarëve të parë të UÇK-së për intervistë në Hagë me ftesë gjykatës speciale në Kosovë, tha sot se Kosova beson në pastërtinë e luftës së UÇK-së dhe beson në drejtësi, raporton Anadolu Agency (AA).

Presidenti Thaçi vlerësoi se shkuarja në intervistë e gjeneralëve të Ushtrisë Çlirimtare të Kosovës, Sami Lushtakut, Rrustem Mustafës dhe bashkëluftëtarëve të tjerë edhe një herë tregon bujarinë dhe luftën e drejtë të popullit të Kosovës dhe UÇK-së.

"Si bashkëluftëtar i juaj dhe president i vendit, kam besim të plotë në vlerat sublime për të cilat kemi luftuar. Bashkërisht i fituam shumë beteja, lirinë dhe pavarësinë e Kosovës. Bashkërisht me krenari do t’i fitojmë edhe sfidat e radhës. Shembulli i juaj për t’iu përgjigjur ftesës së Dhomave të Specializuara dëshmon më së miri se luftëtarët e lirisë së Kosovës nuk i lëkund asnjë lloj pretendimi stigmatizues", ka shkruar Thaçi në profilin e tij në Facebook.

Ai shtoi se edhe një herë i bën thirrje të gjithë të ftuarve të tjerë për intervistë që t'iu përgjigjen pozitivisht thirrjes nga Dhomat e Specializuara.

"Në kohën e kanosjes ekzistenciale, ju, me guximin dhe dijen tuaj, të pamundurën e bëtë të mundur, ëndrrën realitet. Ju jeni heronjtë kombëtarë të luftës, prandaj të tillë do të mbeteni gjithmonë për institucionet dhe popullin e Kosovës", shkroi më tej Thaçi.

Presidenti i Kosovës tha gjithashtu se është i vetëdijshëm se shumë padrejtësi nuk e kanë marrë përgjigjen, as nga drejtësia vendore, as nga ajo ndërkombëtare: si vrasja nga shteti serb i 13,500 civilëve shqiptarë, kryerja e 400 masakrave, dhunimi i 20 mijë grave shqiptare, mijëra shqiptarë ende të pagjetur, spastrimi etnik i mbi një milion shqiptarëve, por theksoi besimin se krimet nuk vjetrohen dhe se kryesit do të përballen me drejtësinë.

Ish-komandanti i UÇK-së, Rrustem Mustafa do të merret në intervistë nesër më 14 janar nga Prokuroria Speciale në Hagë, kurse Sami Lushtaku do të merret në intervistë të mërkurën më 16 janar.