Kosovë, përfundon Programi i Bashkimit Evropian për Sektorin e Drejtësisë në Kosovë

Me rastin e përfundimit të Programit të Bashkimit Evropian (BE) për Sektorin e Drejtësisë në Kosovë (EUKOJUST) është mbajtur një konferencë, e cila shënon kulmin e përpjekjeve të përbashkëta katërvjeçare që synojnë rritjen e efektivitetit të sistemit gjyqësor të Kosovës dhe reformave përkatëse në drejtësi, raporton Anadolu.

Shefi i Zyrës së BE-së në Kosovë, ambasadori Tomas Szunyog, tha se projekti EUKOJUST ka një buxhet prej shtatë milionë eurosh.

Szunyog tha se ky projekt ishte shumë ambicioz, duke pasur parasysh përfshirjen e shumë institucioneve, si Ministria e Drejtësisë, Këshilli Gjyqësor dhe Prokurorial i Kosovës, Akademia e Drejtësisë dhe Kuvendi i Kosovës.

Ambasadori i BE-së vlerësoi se ky projekt ka arritur rezultate të rëndësishme, duke u shprehur se ka kontribuar në zhvillimin e burimeve operacionale, si përshkrimi i punës së stafit gjyqësor, analizat për trajnimet e nevojshme dhe krijimi i manualeve të ndryshme.

“Duke forcuar kapacitetin, transparencën dhe përgjegjësinë e gjyqësorit, dua t'ju kujtoj ndihmën e Këshillit Gjyqësor dhe Prokurorial të Kosovës. Kjo asistencë teknike pati rezultate të mëdha në forcimin institucional përmes rregulloreve të përmirësuara dhe procedurave të përmirësuara të rekrutimit dhe trajnimeve të ndryshme gjatë shërbimit për prokurorët, gjyqtarët dhe personelit. Është përmirësuar edhe cilësia e të dhënave për përgatitjen e raporteve për aktivitetet e prokurorëve dhe gjyqtarëve për kërkesat e brendshme dhe të jashtme”, tha ambasadori Szunyog.

Ai shtoi se është ofruar asistencë për hartimin e ligjeve të reja që janë në përputhje me ligjet e Gjykatës Evropiane për të Drejtat e Njeriut, si dhe për një gjykim të drejtë brenda një afati të arsyeshëm.

Ministrja e Drejtësisë e Kosovës, Albulena Haxhiu, tha se projekti EUKOJUST erdhi në kohën e duhur dhe ndihmoi në korrigjimin e mangësive në sektorin e drejtësisë në Kosovë. Ajo theksoi se gjatë dy viteve të fundit 55 për qind e aktiviteteve janë realizuar plotësisht.

“Lista e aktiviteteve dhe nismave të mbështetura nga EUKOJUST-it është shumë e gjatë dhe ne si Ministri e Drejtësisë i jemi mirënjohës për mbështetjen e programit lidhur me aktivitetet në përputhje me hartimin e akteve normative apo projektligjeve apo edhe akteve të tjera nënligjore që dalin nga këto ligje”, tha Haxhiu.

Ajo tha gjithashtu se Ministria e Drejtësisë ka kërkuar shtyrjen e këtij projekti edhe për gjashtë muaj për të përfunduar Kodin Civil dhe shpreson në një përgjigje pozitive.

Gjatë këtij muaji, presidenti i EUROJUST-it, Ladislav Hamran, është takuar me përfaqësues të institucioneve të drejtësisë nga Kosova, të cilët kanë kërkuar që Kosova të jetë e pranishme si vëzhguese e përhershme në EUROJUST, pasi kjo do të jetë një hap i rëndësishëm për forcimin e bashkëpunimit të ndërsjellë.

Presidenti i EUROJUST-it ka vlerësuar bashkëpunimin që prokurorët kosovarë vazhdojnë ta kenë me këtë agjenci të BE-së në fushën e drejtësisë penale.

EUROJUST është agjenci e Bashkimit Evropian për Bashkëpunim në Drejtësinë Penale, e cila trajton format e krimit të rëndë ndërkufitar.