Ekip
23 Qershor 2021•Përditësim: 24 Qershor 2021
Amnesty International akuzoi Greqinë për shkelje të detyrimeve të të drejtave të njeriut sipas BE-së dhe ligjit ndërkombëtar, duke ndaluar në mënyrë të paligjshme refugjatët dhe migrantët dhe duke i kthyer në Turqi, transmeton Anadolu Agency (AA).
Raporti i ri i grupit të të drejtave të njeriut, “Greqia: Dhuna, gënjeshtra dhe kthime prapa”, përqendrohet në rajonin e Evrosit, përgjatë kufirit midis Greqisë dhe Turqisë.
Vitin e kaluar, Greqia i ktheu migrantët pasi Turqia hapi në mënyrë të njëanshme kufijtë e saj. Amnesty tha se këto shkelje të të drejtave të njeriut në kufijtë e Greqisë kanë vazhduar dhe janë bërë një praktikë e zakonshme.
“Është e qartë se krahë të shumta të autoriteteve greke po koordinohen ngushtë për të kapur dhe ndaluar brutalisht njerëzit që kërkojnë siguri në Greqi, duke i nënshtruar shumë prej tyre në dhunë, duke i transferuar në brigjet e lumit Evros (Marica) para se t'i kthejnë në Turqi”, tha Adriana Tidona, studiuese e migracionit për Evropën në Amnesty International.
“Hulumtimi ynë tregon se kthimet e dhunshme janë bërë politika de fakto e kontrollit kufitar grek në rajonin e Evrosit”, tha ajo.
“Niveli i organizimit të nevojshëm për t’i realizuar këto kthime, të cilat prekën rreth 1.000 njerëz në incidentet që ne i dokumentuam, disa herë dhe nganjëherë përmes vendeve jozyrtare të paraburgimit, tregon se deri ku Greqia do t’i kthejë ilegalisht njerëzit dhe t’i mbulojë ato (rastet)”, shtoi Tidona.
Intervistat kërkimore të kryera nga Amnesty International treguan njerëz që pretendonin se kishin qenë dëshmitarë të dhunës nga zyrtarë grekë të uniformuar, si dhe burra me veshje civile. Kjo dhunë përfshinte goditjen me shkopinj, shqelma dhe grushta, shuplaka dhe shtyrje. Sipas organizatës, disa njerëz janë plagosur rëndë.
Grupi tha në shumicën e rasteve, këto akte dhune shkelnin ndalimin ndërkombëtar të trajtimit çnjerëzor ose degradues, duke shtuar se disa incidente gjithashtu përfshinin tortura, për shkak të ashpërsisë së tyre dhe qëllimit poshtërues ose ndëshkues.
Greqia jo vetëm që i ka shtyrë njerëzit prapa në kufijtë e saj, por gjithashtu i ka ndaluar ata thellë në territorin kontinental grek përpara se të ktheheshin mbrapa në mënyrë të paligjshme.
Turqia dhe grupet e të drejtave të njeriut kanë dënuar në mënyrë të përsëritur praktikën e paligjshme të Greqisë për të shtyrë mbrapa azilkërkuesit, duke thënë se ajo shkel vlerat humanitare dhe ligjin ndërkombëtar duke rrezikuar jetën e migrantëve të pambrojtur, duke përfshirë gratë dhe fëmijët.
