Arabia Saudite kërkon largimin e librave të Kardavit nga institucionet

RIJAD (AA) - Ministria e Arsimit e Arabisë Saudite ka dhënë udhëzimin për mbledhjen e menjëhershme të librave të dijetarit nga Egjipti dhe kreut të Unionit Botëror të Dijetarëve Muslimanë, Jusuf el Kardavi nga shkollat, universitetet dhe bibliotekat, transmeton Anadolu Agency (AA).

Në deklaratën e publikuar në faqen zyrtare të ministrisë e cila mban nënshkrimin e ministrit Ahmed bin Muhammed theksohet se është e nevojshme që "menjëherë" të largohen nga shkollat, universitetet dhe bibliotekat të gjitha librat e Kardavit.

Siç thuhet në deklaratë, vendimi është marrë në mënyrë që të parandalohet ndikimi i librave dhe ideologjive që mbështesin terrorizmin, ndërsa tani e tutje do të ndalohet edhe shtypja e këtyre librave.

Të hënën, Arabia Saudite, Emiratet e Bashkuara Arabe (EBA), Bahreini, Egjipti dhe Jemeni njoftuan për ndërprerjen e të gjitha marrëdhënieve diplomatike me Katarin duke e akuzuar atë për "mbështetje të terrorizmit".

Më pas, përmes një deklarate të përbashkët, Arabia Saudite, Emiratet e Bashkuara Arabe (EBA), Bahreini dhe Egjipti futën në "listën e terrorizmit" 59 njerëz dhe 12 organizata bamirëse që mbështeten nga Katari, përfshirë edhe Jusuf el Kardavin, duke i akuzuar ato për "lidhje me terrorizmin".