Çavuşoğlu takohet me presidentin libanez, Aoun

Presidenti i Libanit, Michel Aoun priti në takim ministrin e Jashtëm të Turqisë, Mevlüt Çavuşoğlu, i cili ndodhet për takime zyrtare në këtë vend, transmeton Anadolu Agency (AA).

Presidenti libanez Aoun në një deklaratë në llogarinë e tij në Twitter tha se është takuar me ministrin Çavuşoğlu në pallatin Baabda.

Në një deklaratë për gazetarët pas takimit të tij me Aoun, Çavuşoğlu tha: "Ne biseduam me presidentin për përmirësimin e marrëdhënieve midis Turqisë dhe Libanit. E përgëzova për formimin e qeverisë së re. Gjithashtu e përgëzova paraprakisht për rastin e 22 Nëntorit që është Dita Kombëtare e Libanit".

Çavuşoğlu tha se në kuadër të kontakteve të tij zyrtare në Liban do të takohet edhe me kryeministrin Najib Mikati, kryetarin e Kuvendit, Nabih Berri dhe ministrin e Jashtëm, Abdallah Bou Habib.

Ministri Çavuşoğlu u takua për herë të parë me ministrin libanez të Ekonomisë, Amin Salam kur mbërriti dje në Bejrut.