Emiratet e Bashkuara Arabe mohojnë se kanë kufizuar hyrjen e shtetasve iranianë

Emiratet e Bashkuara Arabe kanë mohuar raportet që sugjerojnë se zyrtarët e EBA-së kanë kufizuar hyrjen e shtetasve iranianë, transmeton Anadolu.

"Emiratet e Bashkuara Arabe janë shtëpia e një komuniteti iranian të respektuar dhe të vlerësuar që formon një pjesë integrale të strukturës së saj shoqërore dhe kontribuon në diversitetin dhe hapjen e saj", tha Ministria e Jashtme në një deklaratë të enjten.

Ministria hodhi poshtë "lajmet e pasakta të medias" në lidhje me statusin e rezidencës së shtetasve iranianë, duke theksuar se politikat e vendit ndjekin procedurat e përcaktuara të hartuara për të mbrojtur sigurinë dhe mirëqenien e të gjithë banorëve pa përjashtim.

Deklarata e ministrisë erdhi pas lajmeve të shumta të medias, përfshirë një lajm nga "Wall Street Journal", se shumë iranianëve që ishin jashtë vendit gjatë luftës iu anuluan lejet e tyre të qëndrimit në EBA.

Tensionet në Lindjen e Mesme janë përshkallëzuar që kur Izraeli dhe SHBA-ja nisën ofensivë të përbashkët kundër Iranit më 28 shkurt.

Irani është hakmarrë me sulme me dronë dhe raketa që synojnë Izraelin, Jordaninë, Irakun dhe vendet e Gjirit që strehojnë asete ushtarake amerikane, duke shkaktuar viktima dhe dëme në infrastrukturë ndërsa ka prishur tregjet globale dhe aviacionin.