Erdoğan: Përparim domethënës drejt normalizimit midis Türkiyes dhe Armenisë

Presidenti turk, Recep Tayyip Erdoğan, ka deklaruar se një “përparim domethënës” është bërë drejt normalizimit midis Ankarasë dhe Jerevanit “pa parakushte”, transmeton Anadolu.

Presidenti Erdoğan priti kryeministrin armen, Nikol Pashinyan, në Shtëpinë Turke në margjinat e Asamblesë së Përgjithshme të OKB-së në New York, ku diskutuan normalizimin Türkiye-Armeni dhe procesin e paqes midis Armenisë dhe Azerbajxhanit.

Sipas Drejtorisë së Komunikimeve të Türkiyes, presidenti Erdoğan tha se “Türkiye mbështet vendosjen e paqes së qëndrueshme midis Azerbajxhanit dhe Armenisë dhe vendosjen e një miqësie solide midis dy vendeve në periudhën e re”.

Ai gjithashtu tha se Ankaraja është e gatshme të ndihmojë në këtë proces.

Më tej, presidenti turk shprehu “mbështetjen e tij të sinqertë” për vazhdimin e procesit të dialogut me Armeninë.

Türkiye e njohu Armeninë në vitin 1991 pas shpalljes së saj të pavarësisë. Megjithatë, Ankaraja ndërpreu marrëdhëniet diplomatike dhe tregtare me Jerevanin në vitin 1993 në mes të Luftës së Parë të Karabakut, e cila filloi me sulmet e Armenisë ndaj Azerbajxhanit.

Pas përfundimit të Luftës së Dytë të Karabakut në vitin 2020, Ankaraja dhe Jerevani emëruan reciprokisht përfaqësues special në vitin 2021, me qëllim për të normalizuar marrëdhëniet.

Pas një sërë takimesh midis ambasadorit turk, Serdar Kılıç dhe nënkryetarit të Asamblesë Kombëtare të Armenisë, Ruben Rubinyan, fluturimet direkte rifilluan në shkurt të vitit 2022 dhe u ra dakord që të hapet kufiri Türkiye-Armeni për qytetarët e vendeve të treta dhe në muajin korrik të të njëjtit vit të fillojë tregtia ajrore e mallrave midis dy vendeve.

Këtë korrik, përfaqësuesit special mbajtën takimin e tyre të pestë në vendkalimin kufitar Alican-Margara dhe riafirmuan angazhimin për të ndjekur procesin e normalizimit “pa parakushte”.