Fidan: Është absurde ta mendosh dëbimin e palestinezëve nga Gaza

Ministri i Jashtëm turk Hakan Fidan u shpreh se plani i presidentit amerikan Donald Trump për zhvendosjen e palestinezëve nga Gaza është i papranueshëm, raporton Anadolu.

Duke folur në redaksinë e editorëve të Anadolu-t në Ankara, Fidan trajtoi çështje kyçe rajonale, përfshirë deklaratat e fundit të presidentit amerikan rreth Gazës, si dhe qëndrimin e Sirisë ndaj terrorizmit dhe bashkëpunimin në sferën e sigurisë.

"Çështja e dëbimit është një situatë që as rajoni e as ne nuk mund ta pranojmë. Është absurde ta mendosh këtë. Është gabim madje të diskutohet kjo çështje", tha Fidan, duke shtuar:

"Jemi kundër të gjitha nismave që kërkojnë të përjashtojnë popullin e Gazës nga ekuacioni".

Ai gjithashtu u shpreh se bota po shkon drejt "ligjit të xhunglës", ku askush nuk merr në konsideratë nevojat e të tjerëve dhe zbaton filozofinë "unë e bëj sepse jam i fortë".

- Qëndrimi i administratës së re siriane plotëson nevojat e sigurisë së Türkiyes

Duke folur rreth Sirisë, kryediplomati turk tha se administrata e re siriane nuk ka plane të përfshihen në bisedime për federatë apo rajone autonome.

Fidan tha se qëndrimi i presidentit të përkohshëm sirian Ahmad al-Sharaa ndaj grupit terrorist PKK/YPG është "jashtëzakonisht i qartë" dhe plotëson nevojat e sigurisë së Türkiyes.

Ai tha se Siria do të kthejë ose "eliminojë" të gjithë terroristët e PKK-së që kanë ardhur nga vende të ndryshme, "për të siguruar unitetin e saj kombëtar".

Lidhur me luftën kundër terrorizmit në rajon, Fidan njoftoi hapat për krijimin e një mekanizmi të përbashkët midis Türkiyes, Irakut, Sirisë dhe Jordanisë për të luftuar grupin terrorist DEASH.