Filipine, rritet në 3 numri i rasteve me virusin Mpox

Raportohet se me zbulimin e virusit Mpox (lia e majmunit) në Filipine, numri i rasteve në mbarë vendin është rritur në 3, transmeton Anadolu.

Në llogarinë e Ministrisë së Shëndetësisë të Filipineve është bërë një deklaratë në lidhje me rritjen e rasteve në vend.

Në deklaratë thuhet se varianti më i butë i virusit Mpox, Clade 2, u zbulua te dy persona rreth të 30-tave që banonin në kryeqytetin Manila dhe rrethinën e saj.

Numri i rasteve aktive të zbuluara në Filipine në valën epidemike globale të shkaktuar nga varianti i ri Mpox arriti në 3.

Rasti i parë i lisë së majmunit këtë vit në Filipine u zbulua më 19 gusht.

- Urgjenca e shëndetit publik

Drejtori i Përgjithshëm i Organizatës Botërore të Shëndetësisë (OBSH), Tedros Adhanom Ghebreyesus vendosi të mblidhte Komitetin e Emergjencës të OBSH-së më 14 gusht, duke pasur parasysh potencialin për përhapjen e mëtejshme ndërkombëtare të virusit Mpox.

Komiteti i Emergjencës i OBSH-së shpalli opinionin e tij këshillues se situata në lidhje me virusin Mpox përbën emergjencë të shëndetit publik me rëndësi ndërkombëtare.

Unioni Afrikan njoftoi se një emergjencë e shëndetit publik në mbarë kontinentin u shpall kundër virusit Mpox, i cili po përhapet me shpejtësi në vendet afrikane.

- Virusi Mpox

Virusi Mpox transmetohet nga brejtësit si minjtë dhe ketrat ose nga individë të infektuar. Prekja e skuqjeve të trupit të shkaktuara nga virusi, përdorimi i rrobave, çarçafëve, peshqirëve dhe sendeve të ngjashme të kontaminuara me këto skuqje dhe kontakti me lëngjet trupore janë ndër shkaqet më të rëndësishme të kontaminimit.

Simptomat e para mund të shfaqen brenda 5 deri në 21 ditë pas marrjes së virusit. Virusi në përgjithësi shkakton temperaturë të lartë, dhimbje koke, dhimbje shpine dhe muskujsh, ënjtje të nyjeve limfatike, lodhje, të dridhura dhe flluska në lëkurë të ngjashme me linë e dhenve.

Sëmundja, e cila nuk ka metodë specifike trajtimi, trajtohet me barna antivirale. Shumica e rasteve kanë sëmundje të lehtë dhe shërohen brenda pak javësh.

OBSH-ja në vitin 2022 ndryshoi emrin e sëmundjes nga "lia e majmunit" në "Mpox" për shkak të shqetësimeve rreth racizmit dhe diskriminimit.