Rabia İclal Turan
08 Maj 2020•Përditësim: 09 Maj 2020
Xhamitë në Gjermani këtë fundjavë do të rihapin dyert e tyre për adhuruesit, pas një vendimi të qeverisë për lehtësimin e kufizimeve të koronavirusit të ri (COVID-19) në vend, raporton Anadolu Agency (AA).
Sipas disa udhëzimeve të përcaktuara nga Këshilli Koordniues Musliman i Gjermanisë (KRM), xhamitë gradualisht do të rihapen në të gjithë vendin.
Kreu i Shoqatës së Xhamive Sehitlik, Yakup Ayar, tha se ndjehet i lumtur që do të ri-bashkohet me komunitetin musliman në Berlin.
"Ne do t'i pranojmë mysafirët tanë në xhami vetëm përmes një dere. Të gjithë do të veshin maska, si dhe do të dezinfektojnë duart e tyre.
Informatat e kontaktit të atyre që vijnë në xhami do të listohen", tha Ayar për AA duke folur për udhëzimet e rrepta.
Ayar tha se odat e abdesit do të jenë të mbyllura dhe njerëzve do t'u kërkohet të marrin me vete qilimat e tyre të lutjes.
Ai njoftoi se autoritetet lokale e kanë kufizuar adhurimin në masë deri në 50 persona, që do të thotë, shtoi ai, njerëzit do të pranohen brenda bazuar në atë që arrin i pari.
Nënkryetar i Shoqatës së Xhamive Ramazan Saglam, tha se namazi i Taravisë dhe Xhumasë do të vazhdojnë të jenë të pezulluara.
"Shpresojmë se do të mblidhemi përsëri në xhamitë tona", tha Saglam për AA.
Njerëzit mbi moshën 65-vjeçare ende u kërkohet të qëndrojnë në shtëpi.
Shërbimet fetare janë ndaluar që nga fillimi i bllokimit të Gjermanisë në mes të muajit mars.
Qeveria gjermane javën e kaluar vendosi të heq disa masa bllokimi të koronavirusit dhe lejoi shërbimet e lutjeve në xhami, kisha dhe sinagogë me kusht që ato të respektojnë kërkesat e higjienës dhe distancimit shoqëror.
