Julian Assange martohet në burg me të fejuarën

Julian Assange u martua me të fejuarën e tij Stella Moris në burgun ku po qëndron në Londër, transmeton Anadolu Agency (AA).

Assange, 50 vjeç, mbetet në burgun Belmarsh ndërsa vazhdon të luftojë kundër ekstradimit në SHBA.

Ai ka dy fëmijë me Morisin, e cila është një avokate 38-vjeçare.

Fustani i nusërisë së Morisit u dizenjua nga Vivienne Westwood dhe velloja e saj ishte e qëndisur me mesazhe të tilla si “trim, i egër, i paepur”.

Moris e përshkroi atë si “një simbol të dashurisë dhe sfidës sonë përballë kësaj situate mizore”.

Westwood dizenjoi gjithashtu një fustanellë për Assange, si shenjë për rrënjët skoceze të australianit.

Në dasmë morën pjesë katër të ftuar, dy dëshmitarë dhe dy roje sigurie. Çifti do të paguajë koston e ceremonisë së burgut.

Fotografitë u bënë nga stafi i burgut dhe të ftuarit u desh të largoheshin pas përfundimit të ceremonisë.

Një zëdhënës i shërbimit të burgjeve tha: “Të gjitha dasmat në burgje duhet të plotësojnë kërkesat e përshkruara në politikën e Shërbimit të Burgjeve”.

Autoritetet amerikane dhjetorin e kaluar fituan sfidën e tyre në Gjykatën e Lartë të një vendimi të mëparshëm që Assange nuk duhet të ekstradohej për shkak të një rreziku real dhe “opresiv” të vetëvrasjes.

Marsin e kaluar, Gjykata Supreme e Mbretërisë së Bashkuar hodhi poshtë ankesën e tij kundër vendimit të Gjykatës së Lartë. Vendimi nëse Assange do të ekstradohet ose jo tani i takon Sekretares së Brendshme britanike Priti Patel.

Nëse ekstradohet në SHBA, Assange do të përballet me 18 akuza për hakim të kompjuterëve të qeverisë amerikane dhe shkelje të ligjit të spiunazhit, si dhe një dënim të mundshëm me vite burg.

Në vitin 2019, ai u tërhoq zvarrë nga ndërtesa e ambasadës së Ekuadorit në Londër, ku ishte strehuar për më shumë se shtatë vjet.

Policia britanike tha se ai u arrestua për anashkalimin e lirimit me kusht në vitin 2012 dhe në emër të SHBA-së për shkak të një urdhri ekstradimi.