Koreja e Veriut dërgon ushtarë shtesë për të luftuar në radhët e Rusisë

Pretendohet se Koreja e Veriut ka dërguar njësite ushtarake shtesë për të luftuar në radhët e Rusisë kundër Ukrainës, transmeton Anadolu.

Sipas lajmit të Yonhap, Shërbimi i Inteligjencës Kombëtare të Koresë së Jugut (NIS) në një shënim informativ që ndau për mediat njoftoi se Koreja e Veriut ka dërguar trupa shtesë për të mbështetur Rusinë, por që numri i saktë i këtyre trupave ende nuk dihet.

"Trupat e Koresë së Veriut u vendosën në vijën e frontit në rajonin e Kurskut që nga java e parë e shkurtit", thuhet në shënimin informativ.

Në lajmet që u paraqitën muajin e kaluar në mediat e Koresë së Jugut pretendohej se Koreja e Veriut ka dërguar midis 1.000 dhe 3.000 ushtarë në Kursk për të luftuar përkrah Rusisë.

Pretendohet se Koreja e Veriut në vitin 2024 ka vendosur rreth 11.000 trupa në rajonin e Kurskut në frontin perëndimor të Rusisë.

NIS ndau një raport të inteligjencës se 300 nga ushtarët e Koresë së Veriut të dërguar në vijat e frontit për të luftuar kundër Ukrainës u vranë ndërsa rreth 2.700 të tjerë u plagosën.

- Marrëdhëniet e Moskës dhe Phenianit

Ministria e Jashtme ruse njoftoi se marrëveshja gjithëpërfshirëse e partneritetit strategjik e nënshkruar midis Moskës dhe Phenianit në qershor 2024 ka hyrë në fuqi në dhjetor 2024.

Kjo marrëveshje parashikon ndihmën e ndërsjellë ushtarake në rast të një sulmi ndaj njërës nga palët dhe se do të kontribuojë në ndërtimin e një sistemi të pandashëm sigurie dhe një rendi botëror shumëpolar në rajonet e Azisë Verilindore dhe Azisë Paqësorit, thuhet më tej.