Zülfiya Yakup
01 Shkurt 2019•Përditësim: 02 Shkurt 2019
PRISHTINË (AA) – Kosova ka mbetur prapa në përmbushjen e Axhendës për Reformat Evropiane (ERA), për shkak të bashkëpunimit të dobët midis Qeverisë dhe Kuvendit të Kosovës, thuhet në raportin e monitorimit mbi “Zbatimin e objektivave të dala nga Axhenda për Reforma Evropiane: Cili ishte progresi i institucioneve gjatë vitit 2018?", raporton Anadolu Agency (AA).
Organizata joqeveritare Grupi për Studime Ligjore dhe Politike (GLSP), Instituti GAP dhe Instituti i Prishtinës për Studime të Politikave (IPSP) të cilët bënë monitorimin, paraqitën progresin e arritur në tre shtyllat e ERA: qeverisja e mirë dhe sundimi i ligjit, konkurrueshmëria dhe klima e investimeve, punësimin dhe arsimin.
Njomza Mjeku nga GLPS deklaroi se ERA përcakton 29 masa në të cilat janë identifikuar 108 aksione, nga të cilat 63 për qind janë plotësuar plotësisht në 2018, 9 për qind janë të pjesshme dhe 18 për qind mbetet për t'u përmbushur.
Si një nga arsyet pse Kosova mbetet prapa në zbatimin e Axhendës për Reformat Evropiane, Mjeku theksoi bashkëpunimin e dobët midis Qeverisë dhe Kuvendit të Kosovës.
"Bashkëpunimi ndërmjet Qeverisë dhe Kuvendit të Kosovës edhe më tej është në ngecje, nuk ka marrëdhënie pozitive në këtë drejtim dhe angazhimi nuk është i mjaftueshëm. ERA duhet të përshpejtojë zbatimin e Marrëveshjes së Stabilizim Asociimit, dhe kjo ka ndikuar tashmë në ndalimin e saj, dhe për tre vitet e fundit, Kosova ka të bëjë pothuajse me të njëjtën axhendë", tha Mjeku.
Duke prezantuar disa nga gjetjet e monitorimit, Mjeku tha se Kosova ishte e angazhuar për të përmbushur axhendën deri në fund të vitit 2017, por që të njëjtat masa duhet të diskutohen në fillim të vitit 2019.
"Në shtyllën e parë ose qeverisjen e mirë dhe sundimin e ligjit kemi plotësuar 11 masa me gjithsej 37 aksione, nga të cilat 73 janë përmbushur plotësisht, 16 për qind pjesërisht dhe 11 për qind mbetet për t'u përmbushur. Institucionet përgjegjëse për përmbushjen e këtyre 11 masave janë Kuvendi, Kabineti i Kryeministrit, Ministria e Drejtësisë, Ministria e Administratës Publike, Komisioni Qendror i Zgjedhjeve, Këshilli Gjyqësor i Kosovës dhe Akademia Gjyqësore", tha Mjeku.
Nora Jusufi nga GAP lidhur me shtyllën e dytë ose konkurrencës dhe klimës së investimeve, tha se 12 masa janë monitoruar në baza tremujore me gjithsej 44 aksione, nga të cilat rreth 57 për qind janë përmbushur plotësisht.
"Ajo që vlen të përmendet në tremujorin e katërt të vitit të kaluar është miratimi i Ligjit për Efikasitetin e Energjisë dhe miratimi i bordit të fondit përkatës, por funksionalizimi i tij ende nuk ka filluar. Ka pasur gjithashtu përmirësime në statistikat e prodhuara nga Agjencia e Statistikave të Kosovës dhe prodhimin e statistikave të reja për buxhetet e biznesit, të punës dhe të familjes", tha Jusufi.
Ndërsa Visar Xhambazi nga IPSP, duke dhënë të dhëna nga monitorimi i shtyllës së tretë, punësimit dhe arsimit, vuri në dukje se nga 6 masa me 27 aksione, 59 për qind ishin përmbushur plotësisht, ndërsa 22 për qind mbetën të paplotësuara. Ai deklaroi se plani i punësimit dhe politikat sociale u përmbush plotësisht, por se ka pasur progres modest në fushën e arsimit.
