Kriza e energjisë në Venezuelë, 5 ditë pushim në javë për punonjësit publik

KARAKAS (AA) - Në kuadër të masave për kursimin e energjisë e ndërmarrë si pasojë e krizës energjetike në Venezuelë janë shkurtuar për një periudhë të caktuar ditët e punës për nëpunësit shtetërorë, raporton Anadolu Agency (AA).

Presidenti Nicolas Maduro njoftoi se nëpunësit në shtet për të paktën dy javë do të shkojnë në punë vetëm ditën e hënë dhe të martën.

Maduro ka njoftuar ndër të tjera se për shkak të thatësirave ekstreme niveli i ujit në digën më të madhe të vendit ka rënë nën nivelin e limitit më të ulët për punimet hidroelektrike.

Ndërsa vihet në dukje se që nga fillimi i këtij muaji në vend e premtja është shpallur ditë pushimi, përfshirë nëpunësit dhe mësuesit e shkollave. Gjithashtu theksohet se punonjësit në spitalet shtetërore dhe ato në markete do të vazhdojnë punën e tyre normalisht.

Në Venezuelë theksohet se rreth 3 milionë nëpunës në sektorin publik do të marrin pagën edhe për ditët që nuk do të shkojnë në punë.

Ministri i Energjisë Luis Motta ditën e premte deklaroi se që nga fillimi i kësaj jave për një afat 40 ditor në vend do të bëhen ndërprerje të energjisë elektrike për 4 orë në ditë.