Kryediplomatja gjermane, Baerbock: Putini e shkatërroi edhe vendin e tij

Ministrja e Jashtme e Gjermanisë, Annalena Baerbock, në lidhje me zhvillimet e fundit në Rusi deklaroi se presidenti rus, Vladimir Putin, ka shkatërruar vendin e tij, transmeton Anadolu.

Baerbock bëri deklarata para takimit të ministrave të jashtëm të BE-së në Luksemburg.

"Putini po shkatërron edhe vendin e tij. Ne gjithashtu i shohim pasojat shkatërruese të luftës së Rusisë (me Ukrainën) në sistemin e pushtetit të Putinit. Ne shohim se udhëheqësia e Rusisë po sulmon gjithnjë e më shumë veten dhe ka çarje të mëdha në propagandën ruse", tha Baerbock.

Duke theksuar se ka një luftë të brendshme për pushtet në Rusi dhe ata nuk janë të përfshirë në të, Baerbock tha se, "Çfarë po ndodh atje është ende e paqartë. Është e qartë, ky është vetëm një ekran në lojën ruse dhe çfarë po ndodh me aktorë të ndryshëm në Rusi mbetet ende e paqartë".

Ajo theksoi se lufta kishte një efekt brutal mbi Rusinë, e cila sipas saj shkelte ligjin ndërkombëtar dhe kishte pasoja ekonomike.

"Mijëra njerëz u larguan nga Rusia sepse nuk donin të jetonin në Rusi. Kështu që është e paqartë se çfarë veprimesh të tjera do të zhvillohet në këtë lojë", tha Baerbock.

Ajo tha se analizuan me kujdes zhvillimet, dhe se e vetmja gjë e rëndësishme për evropianët është të mbështesin Ukrainën që të jetojë sërish në paqe dhe liri.

Annalena Baerbock tha se për këtë arsye ata e rritën kontributin në Fondin Evropian të Paqes me 3,5 miliardë euro dhe se pala gjermane do të sigurojë 45 tanke kundërajrore Gepard deri në fund të vitit.

Duke thënë se është shumë e rëndësishme për Evropën që Ukraina të jetojë sërish në paqe dhe liri, Baerbock tha se është e rëndësishme për ta që Rusia jo vetëm të pranojë sërish rendin evropian të paqes, por edhe ta respektojë atë.

- Revolta e grupit Wagner kundër sundimit rus

Yevgeny Prigozhin, themeluesi i kompanisë private të sigurisë Wagner, akuzoi ushtrinë ruse se sulmoi Wagnerin dhe kërcënoi se do të përgjigjej, ndërsa luftëtarët e Wagner u larguan nga Ukraina dhe hynë në rajonin kufitar të Rostovit.

Pas kësaj situate, Shërbimi Federal i Sigurisë (FSB) hapi një çështje penale me akuzën për "trazirë të armatosur".

Presidenti rus, Vladimir Putin, e përshkroi rebelimin e grupit Wagner si "tradhti".

Prigozhin njoftoi se ata do të shkojnë në Moskë ku edhe administrata e Kremlinit kishte rritur masat e sigurisë në shumë pjesë të vendit.

Raportohet se Yevgeny Prigozhin pranoi propozimin e presidentit bjellorus Aleksandr Lukashenko për të ulur tensionet në Rusi më 24 qershor.

Prigozhin njoftoi se ata e kuptonin përgjegjësinë për derdhjen e gjakut rus dhe se do të kthenin kolonat e tyre dhe do të kthehen në kampet fushore sipas planit.

Zëdhënësi i Kremlinit, Dmitriy Peskov, deklaroi se çështja penale kundër Prigozhin do të mbyllet dhe deklaroi se "udhëheqësi rebel" do të shkojë në Bjellorusi.