KS-OKB nesër shqyrton zhvillimet në Arakan

NEW YORK (AA) – Këshili i Sigurimit të Kombeve të Bashkuara (KS-OKB) do të mblidhet të mërkurën për të diskutuar dhunën mbi muslimanët në Arakan të Mianamarit, raporton Anadolu Agency (AA).

Ambasadori britanik në OKB, Matthew Rycroft deklaroi se Britania e Madhe dhe Suedia kanë kërkuar mbledhjen e Këshillit nga shkaku i dhunës e cila akoma po vazhdon në Arakan.

Rycroft tha se të gjitha anëtaret e KS-OKB-së janë të shqetësuar për situatën në të cilën gjenden Rohingyat, një numër i madh i të cilëve tenton të braktisë Arakanin.

Zëdhënësja e Komisariatit të Lartë për Refugjatët pranë Kombeve të Bashkuara (UNHCR) Duniya Aslam Khan, të hënën bëri të ditur se për shkak të dhunës në Mianmar në Bangladeshin fqinj kanë ikur 313 mijë muslimanë të Arakanit (Rohingya).

Një numër i madh i muslimanëve të Arakanit kanë humbur jetën që nga 25 gushti si rezultat i sulmeve të ushtrisë së Mianmarit, e cila pohon se është duke luftuar militantë të armatosur.

Gjatë sulmeve të ushtrisë dhe budistëve radikalë janë shënjestruar mbi 150 fshatra, ndërsa dhjetëra prej tyre janë djegur. Dhjetëra mijëra muslimanë të Arakanit përpiqen të ikin nga rajoni për shkak të sigurisë, duke shkuar në zona relativisht të sigurta ose duke u përpjekur të kalojnë në Bangladesh.

Numri i saktë i viktimave ende nuk mund të verifikohet, për arsye se qeveria e Mianmarit nuk lejon hyrjen e organizatave ndërkombëtare. Organizatat e shoqërisë civile në Arakan bëjnë të ditur se numri i civilëve që kanë humbur jetën ka kaluar mbi një mijë, ndërsa disa të tjera pohojnë se bilanci është disa mijëra.