Laura Codruta Kövesi emërohet kryeprokurorja e parë e BE-së

Parlamenti Evropian dhe Këshilli Evropian janë pajtuar të emërojnë Laura Codruta Kövesi si kryeprokuroren e parë evropiane, transmeton Anadolu Agency (AA).

Komisioni i Bashkimit Evropian (BE) njoftoi se Zyra e Prokurorit Publik Evropian do të jetë një zyrë e pavarur dhe e decentralizuar e prokurorisë së bllokut me kompetenca për të hetuar, ndjekur dhe gjykuar shkelësit e buxhetit të BE-së.

Selia e zyrës do të jetë e vendosur në Luksemburg, ndërsa Kövesi do të ushtrojë këtë funksion në një mandat 7-vjeçar të pa-renovueshëm.

"Ajo do të jetë përgjegjëse për organizimin e punës së Zyrës së Prokurorit Publik Evropian, duke përfaqësuar, duke drejtuar aktivitetet dhe duke u kujdesur për funksionimin efektiv të zyrës", tha Komisioni i BE-së.

46-vjeçarja Kövesi ishte kryeprokurorja e Drejtorisë Kombëtare të Antikorrupsionit në Rumani derisa u pushua nga detyra në vitin 2018.