Netanyahu: Izraeli do të vazhdojë të luftojë në Gaza deri në “fitore të plotë”

Kryeministri izraelit, Benjamin Netanyahu, ka deklaruar se Izraeli do të vazhdojë operacionet e tij ushtarake në Rripin e Gazës derisa të arrihet “fitorja e plotë”, transmeton Anadolu.

“Ne jemi në rrugën drejt fitores së plotë dhe nuk do të ndalemi. Ky pozicion përfaqëson shumicën dërrmuese të popullit”, citohet Netanyahu në një njoftim nga zyra e tij, gjatë takimit të tij me përfaqësuesit e familjeve nga Forumi Heroizmit.

Ky është komenti i parë zyrtar izraelit pasi Katari tha se Hamasi është përgjigjur “pozitivisht” ndaj një propozimi të marrëveshjes. Ndërmjetësuesit, përkatësisht SHBA-ja, Egjipti dhe Katari, po bëjnë presion për një marrëveshje midis Izraelit dhe Hamasit për një armëpushim dhe lirimin e pengjeve në Gaza dhe të burgosurve palestinezë në Izrael.

Lufta filloi pas ofensivës ndërkufitare të Hamasit më 7 tetor, ku Tel Avivi thotë se u vranë rreth 1.200 izraelitë dhe rreth 240 të tjerë u morën peng. Afërsisht gjysma e pengjeve u liruan gjatë një armëpushimi njëjavor të muajit nëntor në këmbim të 240 të burgosurve palestinezë.

Që atëherë, sulmet e Izraelit kanë vrarë mbi 27 mijë palestinezë dhe sipas Kombeve të Bashkuara (OKB), rreth 85 për qind e popullsisë prej 2.3 milionë banorësh të Gazës është zhvendosur.