Putin propozon ndërtimin e qendrës së gazit natyror në Türkiye

Presidenti rus, Vladimir Putin, i ka propozuar homologut të tij turk, Recep Tayyip Erdoğan, ndërtimin e një qendre të gazit natyror në Türkiye, raporton Anadolu Agency (AA).

Duke folur në margjinat e një takimi rajonal në Kazakistan, Putin tha se ndërtimi i një qendre në Türkiye, ndër të tjera, do të lejonte rregullimin e çmimeve, shitjen e gazit me çmimet e tregut "jo të larta", si dhe përjashtim e "politizimit" të çështjes.

Në takimin me Erdoğan në Astana në margjinat e Konferencës mbi Ndërveprimin dhe Masat e Ndërtimit të Besimit në Azi (CICA), Putin e vlerësoi Türkiye-n si "partnerin më të besueshëm" për dërgesat e gazit në Evropë.

Putin gjithashtu tha se ndërtimi i termocentralit bërthamor ‘Akkuyu’ në Mersin të Türkiye-s perëndimore po shkon sipas planit. Ai tha se ky termocentral bërthamor mund të jetë në gjendje të fillojë punën vitin e ardhshëm, në 100-vjetorin e Republikës Turke.

Putin shtoi se Rusia vazhdon dërgesat e gazit natyror përmes tubacionit të gazit ‘Rrjedha Turke’, pavarësisht përpjekjeve për të dëmtuar atë.

Në lidhje me marrëveshjen e Istanbul-it për drithërat, e ndërmjetësuar këtë verë nga Türkiye dhe Kombet e Bashkuara (OKB) dhe e krijuar për të shmangur një krizë ndërkombëtare ushqimore, Putin u ankua se "si më parë, vetëm një pjesë e vogël e drithërave nën marrëveshjen e drithërave shkon në vendet më të varfra".