Ekip
20 Maj 2021•Përditësim: 20 Maj 2021
Një imam është vrarë në pjesën lindore të Republikës Demokratike të Kongis (DRC), ku është në fuqi një shtetrrethim ushtarak për të lejuar forcat e sigurisë të luftojnë grupet e armatosura në rajon, transmeton Anadolu Agency (AA).
Mediat lokale raportojnë se Sheikh Djamali Moussa, një imam i njohur në qytetin Beni të provincës Kivu Veriore, u vra nga një komando e paidentifikuar në Mavivi, rreth 15 kilometra nga qyteti Beni.
Teddy Kataliko, një udhëheqës i shoqërisë civile në Beni, tha se incidenti ndodhi përderisa viktima po kthehej në shtëpinë e tij në mbrëmje.
Kjo është vrasja e dytë e një imami brenda një muaji, pasi më 1 maj, gjatë muajit të Ramazanit, në qytetin Beni u vra imami Sheikh Ali Amin përderisa po kryente faljen e namazit në xhaminë Mupanda.
Të dy imamët ishin të njohur për paralajmërimet e rregullta të tyre mbi lëvizjen e luftëtarëve të Forcave Demokratike Aleate (ADF) në rajon.
Vrasësit akoma nuk janë identifikuar, megjithatë grupi ADF është aktiv në pjesën lindore të vendit.
Rebelët e grupit ADF, me origjinë nga Uganda që nga vitet e 90'ta, për vite me radhë në lindje të DRC-së kanë sulmuar dhe vrarë civilë, si dhe personel të Kombeve të Bashkuar (OKB).
Shpesh herë bastisin fshatrat, duke vrarë dhe rrëmbyer civilë.
Për t'i frenuar aktivitetet e grupeve të armatosura, presidenti Felix Tshisekedi, shpalli një shtetrrethim në fillim të këtij muaji në provincat Kivu Veriore dhe Ituri, në kufi me Ugandën.
DRC-ja është rrënuar nga dhuna për vite me radhë pasi disa grupe rebele luftojnë njëri-tjetrin ose kundër ushtrisë së vendit dhe forcave të OKB-së për kontroll të territorit.
Sipas OKB-së, shfrytëzimi i burimeve natyrore vazhdon të jetë një shkak kryesor dhe nxitës i konfliktit, me shumicën e grupeve të armatosura që kanë lënë mënjanë kërkesat e tyre politike dhe janë përfshirë në trafikimin e mineraleve.
