"Rusia e angazhuar për zgjidhje paqësore në Ukrainë"

Ministri i Jashtëm rus Sergej Lavrov tha të mërkurën se vendi i tij është i vendosur për zgjidhje paqësore të krizës ukrainase, transmeton Anadolu Agency (AA).

Gjatë një bisede telefonike me Anne Linde, kryetaren e Zyrës së Organizatës për Siguri dhe Bashkëpunim Evropian (OSBE) dhe ministren e Punëve të Jashtme të Suedisë, Lavrov theksoi se të gjitha palët duhet të përqendrohen në zbatimin e Marrëveshjes së Minskut.

Marrëveshjet e Minskut u nënshkruan në 2014 dhe 2015 për t'i dhënë fund konfliktit të vazhdueshëm midis separatistëve pro-rusë dhe administratës së Kievit.

Lavrov shprehu shqetësim në lidhje me përshkallëzimin "e shkaktuar nga transferimi i personelit dhe armëve të Kievit në vijën e kontaktit".

Ai shprehu shpresën se "Kryesimi Suedez i OSBE-së do të bëjë përpjekjet e nevojshme për të siguruar që Kievi të përmbushë me përpikëri detyrimet e tij për të zgjidhur konfliktin".

Lavrov i kërkoi Misionit të Vëzhgimit Special të OSBE-së në Ukrainë të rritë përpjekjet për "monitorimin e paanshëm" të situatës dhe t'u kushtojë më shumë vëmendje fakteve të vdekjeve civile dhe shkatërrimit të infrastrukturës civile.

Konflikti në juglindje të Ukrainës është përshkallëzuar javët e fundit. Kievi dhe separatistët akuzojnë njëra-tjetrën për shkeljen e armëpushimit. Ukraina gjithashtu akuzon Rusinë për dërgimin e trupave në kufi ndërsa Moska thotë se lëvizjet e saj janë si përgjigje të "veprimeve provokuese të Kievit".