Rusia mbyll Konsullatën e Polonisë në Kaliningrad

Ministria e Jashtme e Rusisë njoftoi se ka vendosur të mbyllë Konsullatën e Përgjithshme të Polonisë në Kaliningrad, transmeton Anadolu.

Në deklaratën e ministrisë thuhet se Polonia në maj vendosi të mbyllë Konsullatën e Përgjithshme Ruse në Krakow.

"Ky ishte një hap armiqësor", thuhet në deklaratën ku vihet në dukje se i Ngarkuari me Punë i Polonisë në Rusi është thirrur në ministri për këtë arsye.

"Ambasadorit iu dha një notë ku thuhet se vendimi që lejonte aktivitetet e Konsullatës së Përgjithshme polake në Kaliningrad është tërhequr që nga 29 gushti. Çdo veprim armiqësor kundër vendit tonë nuk do të mbetet pa përgjigje ose pa pasoja", thotë Ministria e Jashtme ruse në deklaratë.

- Ngjarja

Më 11 maj, kryeministri polak Donald Tusk pretendoi se zjarri që shpërtheu vitin e kaluar në qendrën tregtare "Marywilska 44" në kryeqytetin polak Varshavë, ishte "zjarrvënie" e orkestruar nga agjencitë ruse të inteligjencës.

Ministri i Jashtëm polak, Radoslaw Sikorski më pas njoftoi vendimin për të mbyllur Konsullatën e Përgjithshme ruse në Krakow.

Zëdhënësi i Kremlinit, Dmitry Peskov deklaroi se akuzat e Polonisë kundër Rusisë ishin "të pabaza" dhe "të pavërteta". "Kjo është një qasje jomiqësore ndaj vendit tonë. Polonia ka zgjedhur të mbajë një qëndrim armiqësor kundër nesh", tha Peskov.