Rusia njeh qeverinë e talebanëve në Afganistan

STAMBOLL (AA) - Rusia ka njohur zyrtarisht qeverinë e talebanëve në Afganistan, njoftoi përfaqësuesi i posaçëm i presidentit rus për Afganistanin, Zamir Kabulov, transmeton Anadolu.

Ministria e Punëve të Jashtme e Afganistanit e konfirmoi gjithashtu këtë, duke njoftuar se ambasadori rus, Dmitry Zhirnov, u takua me ministrin e jashtëm taleban, Amir Khan Muttaqi dhe i përcolli vendimin e qeverisë ruse që thekson “rëndësinë e këtij vendimi”.

Zhirnov e quajti këtë “një hap historik drejt forcimit të marrëdhënieve mes dy vendeve”.

Ministria e Punëve të Jashtme e Afganistanit tha se “me këtë hap, marrëdhëniet dypalëshe mes dy vendeve do të zgjerohen më tej”.

Muttaqi shprehu shpresën se kjo do të çojë në një bashkëpunim më të thelluar dhe “do të forcojë më tej bashkëpunimin mes Afganistanit dhe Rusisë”.

Zhirnov për kanalin shtetëror Rossiya-1 tha se vendimi ishte marrë nga presidenti Vladimir Putin me propozim të ministrit të jashtëm, Sergey Lavrov.

“Kjo tregon dëshirën e sinqertë të Rusisë për të krijuar një partneritet të plotë me Afganistanin”, tha ai.

Rusia ka marrë kryesimin si vendi i parë që njeh zyrtarisht administratën e talebanëve.

Asnjë shtet anëtar i OKB-së nuk e kishte njohur administratën e përkohshme të talebanëve në Kabul që nga rikthimi i tyre në pushtet në gusht të vitit 2021.

Vendi i rrënuar nga lufta po përballet me një krizë të thellë ekonomike, pasi SHBA-ja ka ngrirë 7 miliardë dollarë të aseteve të huaja afgane që nga tërheqja e trupave të huaja pothuajse katër vite më parë.

Vetëm disa vende, përfshirë Kinën, kanë pranuar një ambasador nga administrata e përkohshme e udhëhequr nga Talebanët, ndërsa Pekini dërgoi përfaqësuesin e tij në Kabul në shtator të vitit 2023.