SHBA, arrin në 22 numri i të vdekurve nga koronavirusi

Numri i të vdekurve nga koronavirusi në SHBA është rritur në 22, njoftuan zyrtarët shëndetësorë në Washington, transmeton Anadolu Agency (AA).

ABC News raportoi se tre persona të tjerë kanë vdekur nga koronavirusi i ri i njohur si Covid-19 në shtetin Washington, duke e çuar numrin e të vdekurve në shtet në 19.

Një pacient i moshës 80-vjeçare vdiq në Grant County, Washington, pasi u diagnostikua me Covid-19 të enjten, njoftuan zyrtarët shëndetësorë.

Derisa dy vdekje janë regjistruar në Florida dhe një në Kaliforni, më shumë se 500 persona janë diagnostikuar me virusin në SHBA.

Ndërkohë, shteti federal Oregon shpalli gjendje të jashtëzakonshme të dielën, pas Kalifornisë dhe New Yorkut.

Sipas Organizatës Botërore të Shëndetësisë (OBSH), numri i përgjithshëm i vdekjeve është rreth 3.800 me mbi 110.000 raste të konfirmuara.