Tusk në Sofje: Samiti riafirmim për perspektivën evropiane të Ballkanit

SOFJE (AA) - Samiti BE - Ballkani Perëndimor, i cili mbahet në Sofje të Bullgarisë nesër, është një mundësi për të riafirmuar perspektivën evropiane të Ballkanit Perëndimor, deklaroi sot në Sofje presidenti i Këshillit Evropian, Donald Tusk, raporton Anadolu Agency (AA).

Ai shprehu bindjen se samiti i nesërm, në të cilin do të takohen krerët e BE-së me ata të Ballkanit Perëndimor, për herë të parë pas 15 vjetësh, “do t'i sjellë miqtë nga Ballkani Perëndimor më afër BE-së".

"Duam të shfaqim se jemi të interesuar për zhvillim shoqëror dhe ekonomik të rajonit, këtu dhe tani. Investimi në infrastrukturë dhe në marrëdhëniet ndërnjerëzore në rajon është në interesin më të madh të BE-së, që në fakt është qëllimi i samitit, që t'i afrojmë miqtë tanë nga Ballkani Perëndimor sa më afër BE-së", tha Tusk në konferencën për mediat në Sofje.

Ai ka komentuar edhe vendimet e fundit të presidentit amerikan Donald Tramp, më saktësisht tërheqjen nga marrëveshja me Iranin, tërheqja nga marrëvesjja për klimën dhe zhvendosjen e ambasadës në Kuds, por edhe për taksat mbi çelikun dhe aluminin.

"BE do të duhej të ishte falënderuese, sepse falë tij, ne hoqëm nga mendja të gjitha iluzionet që kishim. Ai na bëri të kuptojmë se nëse të duhet dora e ndihmës, në çdo kohë do të keni në dispozicion dorën tuaj”, theksoi Tusk, për të shtuar se Evropa do të duhet të mbrojë vetveten.

Ai tha se pas tërheqjes së SHBA-ve nga marrëveshja bërthamore me Iranin, nevojitet një front i bashkuar i BE-së, i nevojshëm për t'u përballur me fenomenin e ri të "vetëbesimit të jashtëzakonshëm të administratës amerikane".

"Dëshiroj që liderët e BE-së të konfirmojnë se i mbesin besnik marrëveshjes, përderisa një gjë të tillë e bën edhe Irani, meqë marrëveshja është e mirë për sigurinë evropiane dhe botërore”, tha Tusk.