Ushtria izraelite bastis Bregun Perëndimor dhe Kudsin Lindor

Forcat izraelite kryen disa bastisje në Bregun Perëndimor të pushtuar dhe Kudsin Lindor ndërsa pushtuesit shënjestruan infrastrukturën jetike civile duke sabotuar sistemet e ujësjellësit, transmeton Anadolu.

Guvernatorati i Kudsit tha se ushtarët izraelitë bastisën Al-Ramin në veri të Kudsit dhe Anatën, në verilindje të qytetit. Zyrtarët konfirmuan se gjatë operacioneve nuk u raportuan të plagosur apo të arrestuar.

Burimet raportuan se ushtria izraelite bastisi gjithashtu qytetin e Nablusit në veri të Bregut Perëndimor të pushtuar. Trupat patrulluan rrugët dhe lagjet e banuara gjatë bastisjes.

Në lindje të Tubasit, pushtuesit izraelitë sulmuan komunitetin palestinez Khirbet Yirza. Sulmuesit shkatërruan tubacionet që furnizojnë me ujë banorët palestinezë, duke ndërprerë plotësisht furnizimin me ujë të komunitetit.

Burimet raportuan se pushtuesit kanë sabotuar vazhdimisht tubacionet e ujit gjatë javëve të fundit. Bregu Perëndimor i pushtuar vijon të përballet çdo ditë me bastisje ushtarake, kontrolle të shtëpive dhe arrestime, krahas rritjes së dhunës nga pushtuesit.

Që nga fillimi i gjenocidit të Izraelit në Rripin e Gazës më 8 tetor 2023, forcat izraelite dhe pushtuesit kanë intensifikuar sulmet në Bregun Perëndimor, përfshirë Kudsin Lindor të pushtuar, me vrasje, arrestime, zhvendosje të detyruar, shembje të shtëpive dhe zgjerim të vendbanimeve të paligjshme.