Vriten 5 palestinezë në sulmet izraelite në Rripin e Gazës

Si pasojë e sulmeve të ushtrisë izraelite në Rripin e Gazës gjatë natës, janë vrarë të paktën 5 palestinezë ndërsa dhjetëra të tjerë janë plagosur, transmeton Anadolu.

Siç raporton agjencia zyrtare palestineze e lajmeve WAFA, Izraeli ka vazhduar të bombardojë pjesë të ndryshme të Rripit të Gazës.

Dronët e ushtrisë izraelite kanë goditur një grup civilësh që ishin mbledhur në zonën e Al-Mawasit, pranë qytetit Rafah, në jug të Rripit të Gazës. Në sulm, dy persona humbën jetën dhe 19 të tjerë, disa prej të cilëve në gjendje të rëndë, u plagosën.

Theksohet se ushtria izraelite bombardoi një automjet civil në rajonin e Al-Mawasit, duke shkaktuar vrasjen e dy palestinezëve që ndodheshin në të dhe disa të tjerë u plagosën.

Shtëpia që i përket familjes Al-Jundi është bombarduar në qytetin verior të Gazës dhe sipas gjetjeve fillestare, një person ka mbetur i vrarë në sulm.

Po ashtu, ushtria izraelite vazhdoi të shkatërrojë shtëpitë e palestinezëve me shpërthime në rajonin Bejt Lahiya dhe në kampin e refugjatëve Jabalia ndërsa vazhdoi të lëshojë predha artilerie ndaj qytetit të Gazës.