Bahreini zbulon fushën më të madhe të naftës

MANAMA (AA) - Bahreini ka njoftuar se është gjetur fusha më e madhe e naftës në këtë vend deri më tani, transmeton Anadolu Agency (A).

Sipas një lajmi të agjencisë zyrtare të Bahreinit, Komiteti i Lartë i Resurseve Natyrore dhe Sigurisë Ekonomike përmes një deklarate me shkrim ka njoftuar se është gjetur një depozitë argjilore e lehtë e naftës me rezerva shumë më të mëdha se fushat e naftës në këtë vend, si dhe sasi e madhe e gazit të thellë.

Siç thuhet në deklaratë, zbulimi në fjalë është më i pari që nga hapja e pusit të parë të naftës në vitin 1932, ndërsa fusha e re e naftës do të mbështesë aftësitë konkurruese të Bahreinit dhe do të kontribuojë në zbatimin e projekteve dhe iniciativave për zhvillim.

Ndryshe, si vendi me resurset më të vogla të naftës në mesin e shteteve të Këshillit për Bashkëpunim të Gjirit, Bahreini prodhon naftë të papërpunuar në sasi mes 45 mijë dhe 200 mijë fuçi në ditë.