Gjermani, anulohen qindra fluturime për shkak të grevës

Qindra fluturime u anuluan të enjten në tre aeroporte gjermane pasi stafi i sigurisë filloi një grevë 48-orëshe lidhur me mosmarrëveshjen mbi pagat dhe kushtet e punës, raportoi Anadolu.

Greva e detyroi aeroportin e Hamburgut të anulojë më shumë se 300 fluturime të planifikuara për të enjten dhe të premten, duke prekur rreth 40.000 pasagjerë.

"Anulimet dhe vonesa të fluturimeve gjithashtu mund të priten edhe pas mbërritjeve", tha operatori i aeroportit në një deklaratë dhe u kërkoi pasagjerëve të kontaktojnë kompanitë e tyre ajrore për të anuluar ose rirezervuar fluturimet e tyre.

Aeroporti i Kölnit/Bonit tha se më shumë se 120 fluturime janë anuluar sot dhe shumica e 225 fluturimeve të planifikuara për të premten do të anulohen.

Pasagjerët u këshilluan të kontrollonin statusin aktual të fluturimit të tyre me kompaninë e tyre ajrore ose operatorin turistik përpara se të nisen për në aeroport.

Greva gjithashtu pezulloi dhjetëra fluturime në aeroportin e Düsseldorfit dhe shkaktoi pritje të gjata në pikat e kontrollit të sigurisë në orët e mëngjesit.

Sindikata Ver.di njoftoi se stafi që punon në aeroportin e Stuttgartit do t'i bashkohet grevës të premten.

Sindikata, e cila përfaqëson mijëra punëtorë në sektorin e sigurisë së aeroporteve, kërkon një rritje të pagës jashtë orarit, si dhe pagesa shtesë për punën gjatë fundjavave, festave publike dhe turneve të natës.

Raundi i fundit i negociatave midis sindikatës dhe Shoqatës Federale të Kompanive të Sigurisë së Aviacionit (BDLS) përfundoi pa marrëveshje javën e kaluar.

Raundi i ri i negociatave pritet të zhvillohet më 27 dhe 28 prill.