"Rritet rreziku i shpërbërjes së Eurozonës"

FRANKFURT (AA) - Sipas një ankete të Sentix e cila merret me studimet e pritshmërive të tregjeve, rreziku për shpërbërjen e Eurozonës, brenda 12 muajve u rrit për shkak të problemeve në Greqi dhe Portugali, raporton Anadolu Agency (AA).

Në përfundimet e anketës së Sentix mbi "Indeksin e Shpërbërjes së Eurozonës" për muajin shtator thuhet se gjendja e brishtë e Eurozonës në krahasim me muajt e shkuar nuk ka ndryshuar dhe ka nxjerrë në pah një tablo të zymtë.

Ndërkohë që "Indeksi i Shpërbërjes së Eurozonës" një muaj më parë ishte 15.7 për qind, këtë muaj ai ka pësuar një rritje sipas Sentix duke shkuar në 16.3 për qind. Kjo do të thotë se 16.3 për qind e të intervistuarve mendojnë që Eurozona mund të shpërbëhet brenda një periudhe prej 12 muajsh.