Demolli kërkon anëtarësimin e Kosovës me të drejta të plota në iniciativa rajonale dhe globale të sigurisë

PRISHTINË (AA) - Ministri i Ministrisë për Forcën e Sigurisë së Kosovës (MFSK), Haki Demolli ka kërkuar anëtarësimin e vendit në të gjitha iniciativat rajonale dhe strukturat globale të sigurisë. Ai ka folur për angazhimin e Kosovës në promovimin e stabilitetit dhe sigurisë rajonale e evropiane, gjatë takimit rajonal gjithëpërfshirës të ministrave të Mbrojtjes të Evropës Juglindore si dhe atij të ministrave të Mbrojtjes të vendeve në kuadër të A5, Shtetet e Bashkuara të Amerikës dhe Karta e Adriatikut, i cili po mbahet në Dubrovnik të Kroacisë, njofton MFSK, transmeton Anadolu Agency (AA).

Gjatë kësaj konference janë diskutuar sfidat e sigurisë rajonale dhe mundësia e zhvillimit të mëtejshëm të projekteve aktuale, si dhe iniciativave për projekte të reja në të ardhmen. Po ashtu, është zhvilluar edhe debati strategjik mbi sfidat e sigurisë që kërcënojnë sigurinë evropiane me një fokus të veçantë në rajonin e Evropës Juglindore, si dhe pritjet nga Samiti i NATO-s së Varshavës, i cili do të mbahet në korrik të vitit 2016.

Gjatë fjalimit të tij, ndër tjera, ministri i MFKS-së, Haki Demolli foli edhe për procesin e transformimit të FSK-së në Forca të Armatosura të Kosovës. “Forca e ardhshme do të jetë forcë për të mirën e qytetarëve të saj dhe do të kontribuojë për paqen dhe stabilitetin në rajon e më gjerë dhe duke rikonfirmuar se Forca e Armatosur e Kosovës do të ndërtohet mbi parime të larta demokratike si dhe mbi standardet e NATO-s” ka thënë ministri i MFSK-së, thuhet në njoftimin e kësaj ministrie.

Në takimin e ministrave të Mbrojtjes të vendeve të rajonit, ministri Demolli shprehu gatishmërinë që me kapacitetet aktuale që ka FSK-ja, Kosova të jap kontributin e saj në ruajtjen e paqes dhe të sigurisë, në rajon dhe në botë. Ai u shpreh se FSK-ja, në veçanti, është e gatshme të kontribuojë në operacionet e shkatërrimit të mjeteve të pashpërthyera, në kërkim-shpëtim, mjekësi dhe polici ushtarake.

Gjatë qëndrimit të tij në Dubrovnik, ministri Demolli ka zhvilluar edhe takime bilaterale me ekipin amerikan të udhëhequr nga Dr. Evelyn Farkas, me ministrin e Mbrojtjes së Maqedonisë, Zoran Jolevski, ministren e Mbrojtjes së Shqipërisë, Mimi Kodheli si dhe me ministrin e Mbrojtjes së Kroacisë, Ante Kotromanoviq. Gjatë këtyre takimeve, delegacioni kosovar ka diskutuar për bashkëpunimin bilateral dhe vazhdimin e thellimit të bashkëpunimit në fusha të ndryshme, si të trajnimit, shkollimit në kuadër të planeve bilaterale vjetore.