Argjentina fiton Kupën e Amerikës

Argjentina mposhti Brazilin 1:0 në stadiumin Maracana në Rio de Janeiro duke u bërë kampion i Kupës së Amerikës (Copa America), transmeton Anadolu Agency (AA).

Në minutat e para të ndeshjes, Brazili ishte afër për të shënuar.

Brazili humbi një rast të mirë kur Neymar nuk arriti të shënonte në minutën e 13-të.

Richarlison humbi një tjetër mundësi në minutën e 20-të.

Argjentina tundi rrjetën e Brazilit pasi Angel Di Maria shfrytëzoi rastin për të shënuar me një pasim të shkëlqyeshëm nga Rodrigo De Paul dhe Argjentina kaloi në epërsi 1:0 në minutën e 21-të.

Di Maria humbi një shans për të rritur epërsinë në 2:0 pasi mbrojtja e Brazilit bllokoi goditjen e tij në minutën e 29-të.

Pjesa e parë përfundoi me epërsinë e Argjentinës.

Brazili ishte më agresiv në pjesën e dytë.

Përpjekja e tyre e parë e madhe ndaj golit të Argjentinës dështoi pasi goli i Richarlison nuk u llogarit sepse arbitri dha shenjë për ofsajd në minutën e 52-të.

Ai humbi një shans tjetër për të barazuar dy minuta më vonë, por nuk mundi të mposhtte portierin e Argjentinës, Emiliano Martínez.

Argjentina priste një penallti pasi Messi u rrëzua në zonën e penalltisë, por arbitri nuk dha shenjë në minutën e 63-të.

Ndërhyrja e ashpër e Nicolas Otamendi-t ndaj Neymar-it shkaktoi një përplasje dhe rezultoi me dy kartona të verdhë për Otamendi-n dhe Marquinhos në minutën e 81-të.

Përpjekjet e shumta të Brazilit nuk ishin të frytshme, kurse në minutën e 90-të ndeshja përfundoi 1:0.

Superylli Lionel Messi fitoi trofeun e tij të parë të madh ndërkombëtar me Argjentinën.

Ai luajti për Argjentinën në finalen e Kupës Botërore FIFA 2014 në stadiumin Maracana, por humbi nga Gjermania.

Argjentina u bë kampione për herë të 15-të, duke ndarë rekordin me Uruguajin.

Ata për herë të fundit fituan kampionatin e Copa America në vitin 1993.